Поглед

Пациенти маратонци

Јасмина Јовановска

За да стигнат на лекување во болница, пациентите ќе станат маратонци. За да добијат болнички упат, болните ќе мора да минат лавиринт од амбуланти. Матичниот лекар повеќе нема да може да издава болнички упати, е новината што ја планира Министерството за здравство и тоа, најверојатно, до крајот на јануари. Ова значи дека пациентот за да дојде до болница, освен кај матичниот лекар, ќе мора да затропа и на вратата на специјалистот од поликлиника и на вратата од специјалистот во болница. Ако болничкиот специјалист оцени дека треба да остане во болница, пациентот ќе мора да се врати кај специјалистот од поликлиниката зашто само тој ќе има единствено право да пишува болнички упати. Ова нема да важи за итните случаи. Но, како и да е, болните додека да дојдат до болница или ќе оздрават или ќе појдат на оној свет.

Новиот модел на упатување на болните кон болниците падна како гром од ведро небо. Лекарите се затечени, а пациентите исплашени. Од Министерството за здравство се' уште не е промовиран моделот и затоа и многу не сакаат да го објаснуваат. Но, новината е дел од проектот за регионализација и категоризација на болниците, со кои пациентите нема да можат да изберат болница каде што ќе се лекуваат, туку тоа ќе им го одреди државата. Кој ги прашува пациентите, па тие имаат права, но само на хартија.

И оваа реформа што се протнува во здравството пак е на штета на болните. Па, нели здравствената каса, како што се пофали Владата, е полна како никогаш досега. Или, пак, се' се гледа како да се заштеди здравствениот денар, па бариерите се само начин како болните да се откажат од лекување и да не прават трошоци. А оние со подлабок џеб да го полнат приватното здравство.