ЕДИТОРИЈАЛ

Резил дипломатиjа

Слободанка Јовановска

Амбасадорот-љубовџија Перо Стојановски ни приреди уште една срамна епизода во Австралија. Веќе неколку дена неговото име е тема број еден во австралиските медиуми, а работа имаат и австралиските судски и полициски органи. Тоа што го отфрлаат од МНР како негова „приватна работа“, станува јавна бламажа за Македонија и за македонската иселеничка заедница. Тврдењата дека нашата дипломатија го допре дното со именувањата на секакви партиски миленичиња сега почнуваат и да се потврдуваат откако амбасадорите недипломати почнаа да испорачуваат „резултати“ во земјите во кои се наоѓаат.

Да не е заштитниот ѕид на молк што го изгради министерот Антонио Милошоски околу работата на претставништвата, веројатно, ќе се изнаслушавме уште афери, како што е оваа сега во Канбера. Приватна работа за МНР е очигледно и пријавата од Антикорупциска за амбасадорот во Киев за злоупотреба на милионска сума пари, приватна работа е и што еден од амбасадорите си води кафеански бизнис, приватна работа е што друг амбасадор не доаѓа трезен на работнотото место, еден од нив место да се прочуе по контакти, се фали со шармот, а амбасадорот во Брисел место да ја внесува Македонија од НАТО, тој ја изнесува, но затоа најголем дипломатски успех му беше подготвената храна на НАТО-базарот.

За министер што си го засили тимот во Министерството со бивша девојка и со братучетка, и во чие време ваква „гратче-пејтон“ епизода имаше и во неговата институција, јасно е зошто скандалот со Стојановски е уште една приватна партиска работа.

Знае ли Стојановски зошто воопшто е испратен во Австралија? Амбасадорот, кој официјално се' уште има сопруга, и кој пред Австралијците и Македонците на овој континент требаше да биде политичко, но и морално лице на државата, место да си ја гледа работата, со месеци повеќе време поминуваше кај љубовницата отколку во канцеларија. Досега трпеше само работата, но сега трпи угледот на државата и кредибилитетот на нашата дипломатија, а под прашалник е и повеќе од тоа ако излезе на виделина она за што се заканува изневерената љубовница. Пред неколку години во време на друга влада дипломатка од Вашингтон беше вратена по најитна процедура во Македонија, бидејќи испрати доверлив факс на погрешна адреса, а на Стојановски по се' изгледа нема ништо да му фали, иако личниот лаптоп и други документи се нашле во рацете на љубовницата. Освен ако од МНР не потврдуваат дека амбасадорот освен што бркал женски, не работел буквално ништо, па на лаптопот немал документи што можат да го компромитираат.

Дипломатите, секако, не се безгрешни, но грешките, по правило, си ги плаќаат. Тоа му се случи и на Алајдин Демири кога сакаше пијан да влезе во швајцарскиот парламент и на амбасадорката во Хаг, која доби ќотек од дипломат од понизок ранг, испровоциран од нејзиното однесување. Стојановски замина од Македонија како ексминистер, чија работа ја следеа куп скандали, и во истиот стил си продолжи на новата функција, практично, од првиот ден. На „Фејсбук“ деновиве бивши девојки или љубовници на амбасадорот офкаат околу неговите проблеми, а на министерот Милошоски тоа не му е доволно да сфати дека оваа незрела и хормонална фигура имаше шанса да се поправи - но не ја искористи.