Долг и тежок пат до болница

Јасмина Јовановска


Укинувањето на правото на матичните лекари да препишуваат болнички упати, на пациентите само ќе им донесе дополнителни малтретирања и непотребни шетања низ лавиринтот наречен амбуланти. За да добијат болнички упат по редовен пат, болните ќе мора да затропаат најмалку на вратата на три амбуланти. Прво кај матичниот лекар, па кај специјалистот во поликлиниката, па на крај кај специјалистот во болницата. Ако треба да остане во болница, по упат треба да се врати кај специјалистот од поликлиниката, зошто само тој ќе има право на препишување болнички упат, за разлика од сега, кога матичниот лекар можеше право болниот да го упати во болница или клиника. Новината нема да важи за итните случаи. Лекарите се затекнати од ваквата идеја на Министерството за здрав��тво, а пациентите се револтирани и исплашени, посебно хронично болните. Министерството за здравство и натаму молчи за идејата за новата практика за болнички упати. Таа се промовира како дел од прокетот за категоризација на болниците, со кој точно ќе се знае - пациентите од кој регион во која болница ќе може да се лекуваат. Нема да може за операција на слепо црево да се прескокнуваат болниците, или пак, за еден интренистички преглед, да се прескокнуваат интернистите во поликлиниките, беше најавено со промоцијата на проектот. „И сега за да добиеме лекови на рецепт не' малтретираат да имаме извештај од специјалист или субспецијалист од болница или клиника, а сега со ова само уште повеќе ќе не' шетаат по амбуланти. Свесни ли се дека поголемиот дел од пензионерите едвај одат до матичен лекар. Што им е целта - да се откажеме од лекови на товар на државата, или на крај да се откажеме комплетно од услугите на јавното здравство, за кое сме плаќале со години“, прашува еден астматичар од Скопје.

Со слични реакции се и други пациенти. „Додека да дојдеме до болница ќе испопаѓаме по улици. Кому му текна ваква глупост, мисли ли некој на нас пензионерите“, прашува друг пензионер, кој е срцево болен.

Лекарите првпат слушаат за идејата болнички упати повеќе да не препишуваат матичните лекари, туку само специјалистите од поликлиниките и болниците. „Уште не е извршена категоризација на болниците, а се планира воведување друга новина, за која се уште нема ни најава“, велат лекарите. Од друга страна, се планира матичните лекари да станат семејни лекари, за што профункционира и центар за едукација, а истите тие лекари нема да имаат право да препишуваат болнички упати и да оценуват кој пациент каде што ќе го испратат, додаваат лекарите.

За укинување на ова право, Лекарската комора и Македонското лекарско друштво дознале на состанокот на ден пред Нова година во Министерството за здравство, на кој биле повикани директорите на болниците. На средбата со министерот Османи, како што дознаваме, му било укажано дека овој модел не е добар и да не се избрзува.

Од Македонското лекарско друштво не сакаат да коментираат додека не добијат ништо црно на бело. Со сличен став е и Лекарската комора.