Ерменија прва според број на медали по жител
Со популација од 1,3 милијарди, некој би можел да аргументира дека Кина треба да води на листата на освојувачи на медали на Олимпијадата, но вистинскиот победник е - Ерменија. "Лос Анџелес тајмс" направи листа на земји со медали од ОИ во Пекинг според бројот на жители и по првите шест дена од натпреварувањето што трае од 8 до 24 август според тој параметар води некогашната советска република, која со население од околу три милиони води со три бронзи. Грузија со 4,6 милиони жители е втора со двете злата од џудо и од борење грчко-римски стил, како и со една бронза од стрелаштво. Трета е Австралија, која со 20,5 милиони луѓе во првите шест дена од Олимпијадата освои 16 медали, од кои пет златни.
Според алтернативната табела на "Лос Анџелес тајмс", Бахами со популација од само 300.000 беше најуспешна според бројот на медали по жител на двете претходни олимпијади во Сиднеј 2000 и во Атина 2004. |
