Спасов: Нема да се брза со донесувањето на законот за млади
23.08.2011, 14:44
Нема да се брза со донесувањето на законот за млади кој е во собраниска процедура и покрај тоа што во изработката на Предлог- законот беа вклучени 28 невладини младински организации, а повеќе од 55 го поддржаа предлог текстот.
Ова го истакна дректорот на Агенцијата за млади и спорт Диме Спасов на денешната прес-конференција, нагласувајќи дека ќе се организира јавна дебата и форуми за Предлог-законот на кои ќе бидат поканети сите невладини младински организации за да дадат предлози, бидејќи се уште има можности за унапредување на содржината на законот.
- Целта на првиот закон за млади во независна Македонија во никој случај не е ограничување на младите, туку напротив создавање на јасна и недвосмислена нас��ка за унапредување на сите млади луѓе. Законот ќе им даде можност на младите директно да бидат вклучени во процесите за донесување на одлуки, предлагање и преземање мерки за решавање на проблемите кои ги засегаат на локално и на национално ниво, рече Спасов.
Тој посочи дека Предлогот е усогласен со документите, принципите и насоките на Советот на Европа и Европската унија и оти е многу сличен во своите одредби со хрватскиот и словенечкиот закон.
- Дури и оспоруваниот од опозицијата Државен совет за млади што е предвиден во нашиот закон треба да функционира на принципот на коменаџмент помеѓу државните институции и невладините организации, принцип на кој функционира и Советодавното тело за млади на Советот на Европа, рече Спасов.
Како неоправдани и тенденциозни ги оцени забелешките на опозицијата и на некои младински невладини организации дека Предлог-законот за млади е ограничувачки и оти е неусогласен со принципите и насоките на Советот на Европа и Европската унија иако додаде дека имале и некои конструктивни предлози во забелешките кои во иднина можат да се замат во предвид.
|
