Насловна

ВМРО-ДПМНЕ си избра нов гувернер

Пратениците на ДУИ и на ЛДП вчера не присуствуваа на пленарната седница при изборот на новиот гувернер

Соња Маџовска

Димитар Богов е избран за нов гувернер на Народна банка на Македонија.

Собранието вчера со 62 гласа „за“, сите од пратеничката група на ВМРО-ДПМНЕ, го поддржа предлогот на претседателот Ѓорге Иванов, Богов да биде новиот шеф на централната банка. Тој ќе седне во гувернерската фотелја кон средината на мај, откако и официјално ќе му заврши седумгодишниот ��андат на Петар Гошев.

Покрај пратеничката група на ДУИ, која уште минатата недела се изјасни дека ќе го бојкотира изборот на новиот гувернер, и пратеничката група на ЛДП не учествуваше во процесот на гласање по оваа точка на вчерашната Собраниска седница.

Богов неколку часа пред својот избор имаше шанса, но пропушти да се промовира пред членовите на Комисијата за финансирање и буџет. Иако, тој немаше ни уставна ни законска обврска да го стори тоа, сепак, не ја искористи шансата да ја претстави својата програма и да добие некој позитивен поен кај дел од пратениците. Богов веднаш се јави со реакција дека само се придржува до постапката за избор на гувернер и Деловникот за работа на Собранието. „Без разлика дали ми се допаѓа постапката или не, таа е таква и јас ја почитувам. Фактот што целосно се придржувам кон Законот за НБМ и Деловникот за работа на Собранието, кои се донесени од пратениците на Собранието на Македонија, е најдобра потврда за мојата почит кон оваа институција“, вели Богов во своето обраќање до јавноста. Тој, сепак, додава дека ќе ја продолжи воспоставената практика за претставување на активностите на НБМ пред матичната собраниска комисија.

Собраниската Комисија за финансирање и буџет, која беше закажана еден час пред пленарната, не се одржа, а претседателот на Комисијата, Јован Манасијевски, истакна дека добил лична потврда од Богов дека ќе се појави на седницата, но не му беше јасно зошто тој се премислил. „За жал, за мое големо разочарување, кандидатот за гувернер не дојде на седницата на Комисијата за финансирање и буџет, специјално свикана да му се даде можност да ја образложи својата програма, планови, мерките и активностите што ќе ги презема во наредниот седумгодишен период како шеф на НБМ. Јас сум непријатно изненаден од ова затоа што разговарав со него минатата недела веднаш штом стигна предлогот од претседателот Иванов. Првично, господинот Богов изрази расположение и задоволство дека ќе се претстави, кажа дека му се потребни дополнителни консултации и, за жал, веројатно, врз основа на тие дополнителни консултации, се определил да не дојде“, изјави вчера Манасијевски. Според него, со овој потег новиот гувернер нетраспарентно ја почнува својата кариера. „Недозволиво е да избираме шеф на монетарната власт со најголеми овластувања во економијата во Македонија, а тој да не ја образложи програмата пред надлежната Комисија. Испаѓа дека треба да избираме гувернер на слепо.Во една месна заедница кога се организираат избори, кандидатот ќе се претстави и ќе каже што мисли да направи и што му се плановите, а да не говорам за шеф на монетарната власт. Мислам дека тие што го советувале за жал лошо го советувале и на еден многу лош, нетранспарентен начин ја почнува својата кариера“, вели Манасијевски.

Пратеникот Крсто Муковски од ВМРО-ДПМНЕ го бранеше Богов дека немал обврска да се појави пред Комисијата за финансирање и буџет, а го искритикува Манасијевски дека ја закажал седницата само за да си направи лична промоција. „Она што претседателот на Комисијата Јован Манасијевски го прави и закажува седница на Комисијата на која што тој бара кандидатот за гувернер да даде извештај за работата што ќе ја спроведува, беше закажана без никаква консултација со нас, членовите на Комисијата. Инаку, и Уставот и законите јасно укажуваат на кој начин се избира кандидатот за гувернер. И од тие причини мислам дека седницата што ја закажа Манасијевски е во една насока и со една цел само лична промоција негова и на неговата партија“, истакна Муковски. Тој потенцира дека не знае што размислува Богов и зошто прво прифатил да се појави пред Комисијата и да ја претстави програмата, а потоа се предомислил. „Не знам што размислува Богов, тоа е негова работа јас давам коментирам во име на владејачкото мнозинство. Јасна е процедурата, и според Уставот и според законите на кој начин се избира гувернер на НБМ“, истакна Муковски. (С.М.)