Насловна

Нулите на Гордана Гешковска ѕидаат кули од грешки!

Шврговски тврди дека пропустот не влијаел битно на текот на истрагата во случајот „Пајажина“

Гордана Дувњак

Државниот јавен обвинител, Љупчо Шврговски, јавно ја призна утката на обвинителката Гордана Гешковска во пресметувањето на сумата за, наводно, затаен данок во случајот со фирмите од „Перо Наков“, но се обидува да ја релативизира нејзината вина. Расфрлањето со непрецизни бројки од ракав на обвинителката, која своевремено самиот ја сме��и поради сомневање во нејзината стручност, сега го оквалификува како „техничка грешка“.

Шврговски тврди дека пропустот не влијаел битно на текот на истрагата во случајот „Пајажина“, бидејќи постоело висок степен на основаност на направените кривични дела. Уште почудно е што ни Кривичниот суд не се посомневал во висината на сумата и ја прифатил во целост без задршка и проверка. За експертите, пак, станува збор за катастрофална грешка што фрла темна дамка за капацитетите на Обвинителството, но и за нивната непристрасност.

„Утрински весник“ дознава дека станува збор за поткрадната грешка од, ни помалку ни повеќе, 1,5 милиони евра (90 милиони денари). Приказната потсетува на онаа народната „една нула - една кула“, бидејќи Гешковска додала една нула повеќе кога ги собирала сумите.

„Факт е дека обвинителката Гешковска направила грешка во пресметките, но тоа не влијае битно на самиот тек на постапката, бидејќи сме убедени дека постои висок степен на основаност на кривичните дела, за кои постојат многу докази“, нагласува државниот обвинител во вчерашната изјава за нашиот весник. Тој вели дека е ирелевантно за која сума станува збор затоа што, во крајна линија, точната сума ќе се утврди со вештачењето.

Запрашан околу евентуалната одговорност и консеквенциите во конкретниот случај, тој вели дека сега е преурането да се бара и оти тоа ќе се направи „доколку биде донесена ослободителна пресуда“.

Поранешниот прв човек на Антикорупциска комисија и актуелен фронтмен на „Транспарентност интернешенел - Македонија“, професорката Слаѓана Тасева, е децидна дека станува збор за катастрофална грешка и сериозен пропуст што открива многу работи.

„Просто загрижува неподготвеноста на институциите што се покажува во овој случај, а уште повеќе нивната недоволна координираност. Разочарува и подготвеноста на Обвинителството да се стави во функција на политичка инструментализација“, нагласува Тасева. Таа додава дека оваа институција се' повеќе се претвора во уште едно владино тело за собирање даноци, а не за она што е нивна примарна задача - гонење на сторителите на кривични дела.

Според Тасева, моментно се водат четири паралелни постапки; УЈП прави финален извештај, се води претистражна постапка, истрага и вештачење од експерти, а сите работат врз основа на исти документи.

Државниот јавен обвинител, Љупчо Шврговски, во летото 2008 година лично ги разреши обвинителките Гордана Гешковска и Вилма Русковска, затоа што се сомневаше во нивните стручни капацитети и во нивната поврзаност со МВР. Но, по нивното неколкумесечно отстранување од тогашното Одделение за организиран криминал, Советот за јавни обвинители повторно ги избра, но сега во посебното Обвинителство за организиран криминал.

Во интервју за „Утрински весник“ Шврговски појасни дека смената на обвинителките се случила во време кога Обвинителството функционирало како одделение во рамките на Јавното обвинителство на Македонија и тогаш тој имал овластување да го направи тоа. А, по конституирањето на Советот на јавните обвинители, изборот и разрешувањето на јавните обвинители е во негова исклучива надлежност.

„Јас ги задржав до крај својот дигнитет и достоинство во поглед на мојата одлука за нивна смена, бранејќи си го ставот. Одлуките на Советот како самостоен орган нема да ги коментирам“, рече Шврговски.

Шефот на специјалното обвинителство, Јован Илиевски, во разговорот за нашиот весник од ноември минатата година му даде безрезервна поддршка на целиот свој тим, вклучително и за спомнатите две обвинителки.

„Во Обвинителството за гонење организиран криминал сите обвинители, без исклучок, се високи професионалци и тие ја извршуваат својата работа најдобро што знаат и умеат. Тоа се обвинители со долгогодишно искуство и единствен критериум според кој Советот на јавни обвинители ги реизбра се нивната стручност и професионалност“, подвлече Илиевски.

Во таа пригода Илиевски ја уверуваше јавноста дека во Обвинителство нема селективно постапување.