Силвио Берлускони
Премногу жени дури и за мене
Италијанскиот премиер Силвио Берлускони ги оценил како „неверојатни“ обвинувањата што се подигнати против него во рамките на скандалот „Рубигејт“ и потврдил дека ќе се „брани на телевизија“.
Според миланскиот обвинител, Карима ел Махруг, алијас Руби, малолетничка во тој момент и 32 други млади жени биле намамени на проституција во текот на „бунга-бунга“ вечерта, што ја организирал премиерот.
„Не можам да верувам во злоупотреба на правдата на толку варварски и нереален начин. Имам 75 години и иако сум палав, 33 жени за два месеца би биле премногу, па дури и за 30-годишник“, рекол Берлускони во интервју за дневникот „Ла република“. „Ќе одам на телевизија и ќе објаснам се', и мојата одбрана и одбраната на тие млади жени. И ќе учествувам на сите сослушувања и постапки“, рекол Берлускони. Тој повторил дека никогаш во животот не платил за жена.
Според наводите на истрагата, што ги објавија во вторникот италијанските медиуми, 33 млади жени учествувале во организирани ноќни забави во Аркоре, недалеку од Милано, во луксузната резиденција на Берлускони, од почетокот на 2009 година до јануари 2011 година. |
