Насловна

Македонските проблеми станаа поени за Грција

Атина ли ви е крива што не можете да изберете претседател на ДИК, праша Јоргос Кумуцакос

Слободанка Јовановска



Македонските состојби никогаш досега не ја усреќиле олку многу Грција, чии европарламентарци вчера во Брисел имаа полна уста аргументи зошто нашата држава не треба да добие препорака за преговори со Унијата.

Иако во нацрт-резолуцијата, сепак, влезе барањето на известувачот Зоран Талер преговорите со Македонија веќе да не се одложуваат (веројатно по петти пат), листата на критиките далеку ги надмина позитивните оцени за земјата, а бугарските и грчките европарламентарци поентираа. Тоа веројатно го очекуваше шефот на дипломатијата, Антонио Милошоски, кој, како и секогаш кога треба да се собираат критики, а не поени, не се појави во Европскиот парламент и го испрати вицепремиерот Васко Наумовски.

Единствени позитивни оцени, освен препораката за преговори, беа таа на Јорго Шацимаркакис, дека економскиот прогрес во Македонија бил за пример и покрај кризата, и таа на Едуард Кукан, дека земјата има проблеми, но тие се резултат на фрустрацијата, бидејќи стои во евроинтеграцијата. Затоа, пак, критиките беа поостри од кога и да е, а заклучоците што беа прифатени, исто така.

„Има проблем со албанското малцинство во земјата, што е причина за наша загриженост, иако има веќе десет години откако се применува Охридскиот договор“, посочи Шацимаркакис, забележувајќи му на вицепремиерот за скандалозното испраќање на амбасадорот Ерван Фуере, со порака дека сака делегација на ЕП да дојде во Македонија за да види што се случува во земјата. Според Талер, има согласност во ЕП дека Македонија постигнала многу изминатите 20 години, но и загриженост дека развојот не е доволно брз и дека има проблеми околу политичкиот дијалог, слободата на медиумите, судството и евроинтеграцијата, барајќи Владата да покаже јасен план како сака да ја оствари. Иво Вајгл побара од македонските власти во решавањето на прашањата да бидат пофлексибилни и помодерни, а не да заглавуваат во националистичка политика, а Јоргос Кумуцакос праша директно - Грција ли ви е крива сега за тешкотиите со предвремените избори, со изборот на претседател на ДИК, за препукувањата околу гласањето на дијаспората, нагласувајќи дека сите земји-кандидати за ЕУ досега немале вакви проблеми, туку биле стабилни и демократски. „Само што ќе стане некој критичен спрема власта, веднаш добива реакција, а тој став не е добар“, изјави Евгениј Кирилов, кој очигледно нашите манири ги доживеа како помотивирачки да ја оцрни Македонија место бугарските гробишта, историјата и други нешта од лани.

Не и' дадовме кандидатски статус на Албанија поради кризата со политичкиот дијалог, а исто тоа ќе се случи и со Македонија, предупреди друг парламентарец, прашувајќи дали е вистина дека градоначалникот на Битола направил паралела меѓу ЕУ и холокаустот, на што Наумовски одречно одговори, односно дека бил лошо цитиран од медиумите.

Чарлс Танок беше меѓу ретките кои целосно не се согласија со содржината на извештајот на Талер, изјавувајќи дека не е точно оти македонската Влада не е присутна во Брисел, туку дека проблемот со името тоа што ја кочи европската перспектива на земјата.

Грчките европарламентарци тврдеа дека преговорите за името повторно влегуваат во застој и дека нападите кон европските претставници ја прават атмосферата многу негативна. Мариета Јанаку најави дека Грција не се откажува од барањето да се извади терминот „македонски“ кога е со етничко значење и за именување на македонските власти како власти на државата.

Таа ја обвини Македонија дека ја крши Привремената спогодба со Грција уште од самиот почеток, бидејќи го користи терминот Република Македонија, и дека се' уште не одговорила на последниот предлог даден од посредникот на ОН, Метју Нимиц, кој Грција, наводно, го прифатила. Талер, пак, испрати порака до, како што рече, пријателите во Македонија да водат сметка за советите што им ги дава Европскиот парламент, бидејќи тоа е листата што треба да ја исполнат за ЕУ.

Околу името, тој рече дека е Берлински ѕид што го попречува напредокот на Македонија кон ЕУ веќе шест години. „Не може вака засекогаш. Резултатот на процесот не е неутрален, туку негативен и предизвикува негативни реакции во целиот регион“, предупреди Талер за спорот, барајќи одговорност од двете страни.

Вицепремиерот Наумовски се бранеше дека евроинтеграцијата ни била највисок приоритет, па ја повика ЕУ да се вклучи активно и да ги искористи сите механизми за да не го попречува процесот. За Фуере рече дека бил примен од сите, а за изборите дека ќе се одржат на крајот на мај или првата недела на јуни.

„Македонија нема малцински права како Шведска, но може на неа да се гледа како Шведска на Балканот“, реплицираше тој околу Охридскиот договор. На Грција и' порача дека компромисно решение не е решението што го нуди само едната страна, па наброја дека Атина прво барала композитно име, па композитно име со географска одредница и кога го добила пред самитот во Букурешт го одбила, па продолжила да бара северна или горна Македонија, за да стигне до истото тоа, но по принципот ерга омнес. Ова не отвора простор за компромис“, изјави Наумовски во ЕП.