Нова бламажа на младите кошаркарки на ЕП во Охрид
По четирите срамни порази во групата Б на ЕП во Охрид на македонските кошаркарки до 20 години им преостанува „клучниот“ меч со претпоследната од групата А Велика Британија, кој ќе одлучи кој ќе биде веднаш зад Австрија, последната селекција на турнирот (затоа што беше дел од групата со шест репрезентации).
Ете токму така завршија сите надежи дека домаќинките нема да бидат очајни и дека може да влезат во втората фаза, за што им требаше само една победа. Но, објективно тоа не го заслужија, иако селекторот Александар Петровиќ пред стартот на ЕП ја окарактеризира селекцијата како „генерација која има талент и волја за работа, како можеби ниедна друга досега во нашата кошарка“.
Во последниот убедлив пораз од Словачка 55:91 приказната беше слична на претходните три меча. Недоволната физичка подготвеност им дозволи на нашите кошаркарки да личат на сериозна репрезентација само во првото полувреме. Во првата четвртина имавме минус од три коша (20:23), а втората дури и ја добивме со 16:15. Но потоа за 20 минути примивме 53 коша, а реализиравме само 19. Во тие 20 минути едноставно немавме тим. Се се сведува на индивидуалните способности на Антиќ, која постигна 19 коша и на Тантуровска која реализираше 11.
Конечни табели, група А: Белгија 5 победи/0 порази, Унгарија 4/1, Грција 2/3, Португалија 2/3, Велика Британија 2/3, Австрија 0/5. Група Б: Словачка 4/0, Романија 3/1, Холандија 2/2, Израел 1/3, Македонија 0/4.
Четвртфинале (денеска): Романија - Грција, Словачка - Португалија, Унгарија - Холандија и Белгија - Израел. (Н.К) |
