Подгответе се за врел африкански бран!

Внимавајте! Времето изминатиов викенд беше подносливо ако се спореди со временската прогноза за наредната недела. Африканскиот бран неделава буквално ќе не' поклопи, времето ќе биде пеколно жешко и суво. Секој ден до 15 јули температурите наместа ќе се искачуваат до 40. степен Целзиусов. Особено жешко ќе биде во Повардарието и во југоисточните делови од државава. И во Скопје нема да биде ништо поразлично, максималната температура секој ден ќе се искачува до 38. степен.

„Африканскиот бран, кој веќе длабоко е навлезен во нашата држава и во централна Европа, ќе се задржи до наредниот понеделник. Дури од 16 јули очекуваме намалување на температурите за неколку степени“, најави вчера Костадинка Арсовска, дежурен синоптичар во УХМР. Вели дека неделава полесно ќе се дише единствено во Охрид и Преспа, каде максималната температура нема да надмине 35 степени Целзиусови. На можен дожд ќе можат да се порадуваат само жителите на повисоките места, каде што во вторник и ноќта меѓу четврток и петок ќе има услови за локален дожд. (Дс.Т)