Канчелара се повлече од Тур де Франс

Швајцарскиот велосипедист отпатува кај сопругата во Берн, која деновиве треба да се породи втор пат

Швајцарецот Фабијан Канчелара (31) се откажа од натамошен настап во годинашното издание на Тур де Франс. Тој не се појави на стартот во вчерашната 11. етапа што се возеше во Алпите, од Албервил до врвот на нагорнината на Ла Тусие. Во образложението на ваквата одлука на четирикратниот светски шампион во трките на хронометар и актуелен олимписки првак во таа дисциплина се наведува семејни причини.

„Јас не сум само велосипедист, туку и сопруг и татко кој очекува раѓање на уште едно бебе. Моја лична желба е да бидам крај сопругата Стефани при доаѓањето на свет на нашето второ дете. Тој „трофеј“ е многу поважен од уште една етапна победа на Тур де Франс или од олимписки медал. Уште отсега мора да се заблагодарам на сопругата за трпението што го покажа за време на последниот месец од нејзината бременост и најмалку што можам да сторам е да и' помогнам во овие денови“, објави Канчелара.

Канчелара веднаш отпатува кај сопругата во Берн и во натпреварите треба да се врати на олимписките игри во Лондон каде што ќе настапи во улична трка на 28 јули и во хронометар на 1 август.

„Сите тимски колеги и шефови ја разбираат мојата одлука и се согласуваат со неа“, дополни Канчелара.

Французинот Томас Феклер победи во 10. етапа на велосипедската трка Тур де Франс што се возеше од Макон до Белегард-сур-Валсери во должина од 194 километри. Во целта тој забележа време од 4:46:26 часа што беше за три секунди подобро од Италијанецот Микеле Скарпони на второто место и Германецот Јенс Фогт (+7 сек.) на третата позиција. Бредли Вигинс ја заврши етапата како 13., но и таквиот пласман беше доволен да остане водечки во генералниот пласман.

Резултати од 10. етапа: Томас Феклер (Франција) 4:46:26 часа; Микеле Скарпони (Италија) +3 сек.; Јенс Фогт (Германија) +7 сек.; Луис Леон Санчез (Шпанија) +23 сек.; Дрис Девенинс (Белгија) +30 сек.; итн.

Генерален пласман: Бредли Вигинс (В. Британија) 43:59:02 часа; Кејдел Еванс (Австралија) +1:53 мин.; Кристофер Фрум (В. Британија) +2:07 мин.; Винченцо Нибали (Италија) +2:23 мин.; Денис Менчов (Русија) +3:02 мин.; итн.