12.07.2012, 11:28 Металург пред успех за клупската историја
Во првиот натпревар „железарци“ не успеаја да остварат резултат со кој ќе си обезбедат мирен реванш, иако и постигнатите 2:2 се повеќе од надежни за тимот на Ѓорѓи Христов
Фудбалерите на Металург денеска на стадионот на Башкими во Куманово, со почеток во 17 часот, ќе имаат можност да го оправдаат епитетот фаворит против претставникот на Малта, Биркиркара, истовремено и да го заверат пласманот во второто коло од квалификациите за Лига Европа. По елиминацијата на Шкендија, тимот од Автокоманда заедно со Ренова се единствените претставници на Македонија во ова европско натпреварување.
Во првиот натпревар „железарци“ не успеаја да остварат резултат со кој ќе си обезбедат мирен реванш, иако и постигнатите 2:2 се повеќе од надежни за тимот на Ѓорѓи Христов. До последните три минути од мечот на Малта тие имаа и победа в џеб, пред да погоди Триганца.
Тимот од Автокоманда ќе биде посилен за Агрон Мемеди, кој поради црвен картон го пропушти првиот натпревар, но надвор од игра поради повреди ќе бидат Драган Начевски и Владимир Никитовиќ. Првиот ќе отсуствува поради повреда на коленото, а вториот се пожали на болка во тетивата.
Со победа на Металург или со нерешено 0:0 или 1:1, македонскиот тим во второто коло ќе ги одмери силите со полскиот претставник Рух Хоржов. (Љ.В.)
|
