11.07.2012, 13:04 Трка во Сингапур уште пет години
Еклстоун за весникот „Сингапур тудеј“ изјави дека тајмингот за официјалната објава за обновувањето на договорот ќе биде одреден од сингапурската Влада
Формула 1 ги договори условите со Сингапур за продолжување на договорот за организирање гран-при во градот-држава за уште пет години по трката во септември, потврди првиот човек на овој спорт Берни Еклстоун. Британецот стар 81 година за весникот „Сингапур тудеј“ изјави дека тајмингот за официјалната објава за обновувањето на договорот ќе биде одреден од сингапурската Влада.
„Се' што и' стоеше на патот на Големата награда на Сингапур да продолжи да се одржува уште пет години е расчистено“, изјави Еклстоун. „Среќен сум што ова веќе не е прашање, бидејќи Сингапур е добар за Ф1, а ноќната трка е еднакво добра и за Сингапур“.
Трката првпат се одржа во 2008 година на уличната патека во Марина Беј и, според весникот, правата го чинеле организаторот 35 милиони долари, за сумата минатата година да порасне до 42 милиона. Физибилити-студијата направена по трката во 2010 година покажа дека гран-прито му донело на Сингапур приход од 331 милиони долари само од туризмот во првите три години.
|
