12.07.2012, 15:47 Рашар Луис во Мајами, Грифин останува во Клиперси
Довчерашниот крилен играч на Вашингтон потпиша двегодишен договор со „жешките“, а финансиските детали во него засега не се познати
Рашар Луис (32) ќе ја продолжи кариерата во НБА-шампионот Мајами. Довчерашниот крилен играч на Вашингтон потпиша двегодишен договор со „жешките“, а финансиските детали во него засега не се познати.
Во минатата сезона тој имаше проблеми со повреди поради што одигра само 28 меча во кои забележа просек од 7,8 коша и 3,9 скока. Претходно настапуваше за екипите на Сиетл и на Орландо.
Луис е второ засилување во Мајами, откако во минатата недела на тимот му се придружи и најдобриот тројкаш во историјата на НБА-лигата, Реј Ален (36), кој го напушти Бостон.
И на Западот е интересно за време на летната пауза во НБА-лигата. Блејк Грифин (23) се обврза на нова петгодишна соработка со Лос Анџелес Клиперс за сума од 95 милиони долари. Тој беше прв избор на драфтот во 2009 година, а во американската професионална кошаркарска лига пристигна од Универзитетот Оклахома. Благодарејќи на него и на разигрувачиот Крис Пол, клиперси лани конечно успеаја да обезбедат место во разигрувањето. Грифин имаше просек од 20,7 поени и 10,9 скока по натпревар, а летово го очекува настап и на Игрите во Лондон во дресот на репрезентацијата на САД.
|
