Пападопулу лута на Попоски

Грчката амбасадорка Александра Пападопулу реагираше вчера на тврдењата на шефот на дипломатијата Никола Попоски дека Атина еднострано ја суспендира Привремената спогодба, со порака дека не нивната држава, туку нашата е таа која никогаш не ја прифатила и ја применувала. Нервозната реакција уследи по најавите од Попоски и премиерот Никола Груевски дека очекуваат некаков одговор, т.е. одглас по средбата со грчкиот премиер Лукас Пападимос во Брисел, иако ова очигледно не е тоа.

„Од потпишувањето на Привремената спогодба Грција го применуваше нејзиното писмо и дух во добра волја. Грција не покажа намера да ја суспендира целосно или во некои делови примената на Спогодбата“, стои во писмото на Пападопулу упатено до македонските медиуми. Според неа, Македонија никогаш не ја прифатила Привремената спогодба како договор што наметнува паралелни и реципрочни обврски на двете страни. „Вашата влада, особено по НАТО-самитот во Букурешт во 2008 година, е ангажирана во невидена политика на непријателство и иредентизам против Грција со натамошно присвојување на грчките историски симболи, со употреба на сонцето од Вергина и со отворено сомневање во актуелниот територијален статус кво на Јужниот Балкан“, стои во реакцијата.

Во реакцијата притоа се укажува дека грчката влада со писмени протести многупати укажувала дека непочитувањето на Привремената спогодба ги поткопува пријателските односи меѓу двете земји. Место да се фокусира на преговорите, нашата Влада, според Пападопулу, ги игнорира укажувањата за иредентистички аспирации и илегалните активности, а сега е ангажирана во нов обид да ја дискредитира Грција и да го дефокусира вниманието на меѓународната заедница од решавањето на разликите околу името, иако одолжувањето на тие разлики сериозно ја нарушуваат стабилноста на целиот регион.