12.03.2012, 12:50 Реконструкција на осветлувањето во Старата скопска чаршија
Град Скопје и општина Чаир денеска го почнаа проектот за реконструкција на уличното осветлување во Старата скопска чаршија. Ќе бидат поставени околу 250 канделабри со 472 светилки. Рокот за изработка е 90 дена.
Реконструкцијата и адаптацијата на осветлувањето на Старата скопска чаршија ќе се изведува согласно со проект изработен од „Блаком“-Скопје, за што е добиено и Одобрение од Националната установа „Конзерваторски центар“ - Скопје. Со реконструкцијата ќе бидат опфатени улиците „Битпазарска“, „Дрварска“, „Покриена чаршија“, „Градиште“, „Лазар Танев“, „Подграѓе“, „Јорганџиска“, „Макарија Фрчковски“, „Казанџиска“, „694“, „Ќуркчиска“, „Евлија Челебија“, „412“, „Папуџиска“, „Петар Михов“, „Теодосиј Гологанов“, „Ковачка“ и „Самарџиска“.
Почетокот на градежните работи за реконструкцијата на осветлувањето во Старата скопска чаршија го означија градоначалниците на Град Скопје и на Чаир, Коце Трајановски и Изет Меџити.
- Со одлуката на Советот на Град Скопје и на Советот на општина Чаир за меѓуопштинска соработка меѓу Градот и општината Чаир се реализира овој проект. Вредноста на проектот е скоро 25 милиони денари, од кои 50 отсто ќе финансира општина Чаир, а 50 отсто Град Скопје, рече Трајановски.
Со овој проект, додаде, Скопската чаршија ќе биде целосно осветлена, што ќе придонесе за поголема безбедност, поголемо движење на луѓе и поголемо заживување на Чаршијата.
Градоначалникот Меџити рече дека осветлувањето било долго очекуван проект во Старата скопска чаршија. Тој потсети дека во Чаршијата се изведени повеќе инфраструктурни инвестиции, како реконструкција на калдрмата и поставување хидраулични столпчиња со што, како што рече, Чаршијата стана пешачка зона.
Мухедин Брава, претседател на Здружението „Еснаф“ од Скопската чаршија, рече дека со осветлувањето ќе и се врати атракцијата на Чаршијата, како културно-историски споменик.
Изведувач на работите се „Гранит електрика“, „АДРА“, „Макпримат“ и „Инженеринг ДАСС“.
|
