Новинарите го исвиркаа Вељаноски

На почетокот на вчерашната седница за пратенички прашања, новинарите со извици и свирежи го искажаа своето незадоволство поради кршењето на правата за слободно известување

Татјана Поповска



Револтирани од постапката на претседателот на Собранието од понеделникот, кога со сила ги избрка новинарите, претставниците на медиумите вчера заедно со претседателот на Здружението на новинарите на Македонија, Насер Селмани, го исвиркаа Трајко Вељаноски и со извици „Уа“ демонстративно ја напуштија галеријата во моментот кога тој ја отвораше седницата за пратенички прашања. На истата галерија од каде што пред неколку дена беа насила избркани, новинарите прво станаа, стоеја одредено време и потоа со извици и свирежи го искажаа своето незадоволство поради кршењето на правата за слободно известување.

Претседателот на Собранието не реагираше на ваквите извици на големо незадоволство на новинарите, туку ја отвори седницата на која во салата во делот за опозициските пратеници беа присутни само пратениците од ДПА. Вообичаено и оваа седница почна се задоцнување. Но овој пат премиерот Никола Груевски, кој задоцни 30 минути, заедно со другите министри го чекаше уште 30 минути за да дојде спикерот, претседателот Вељаноски.

Пратеникот од ДПА Имер Алиу го праша премиерот Груевски за односот кон новинарите кои известуваа од Собранието кога се случуваа инцидентите и за тоа дали некој ќе ја преземе одговорноста и ќе понесе соодветни санкции.

„Влечењето новинари, како што се случи во парламентот, е ново откритие тука. Како главен одговорен за овој настан, што презедовте изминативе четири дена за овој случај“, праша Алиу.

Премиерот Груевски искажа жалење за, како што рече, непријатностите со кои се соочија новинарите и додаде дека објаснување за овој случај дал и Вељаноски.

„За тој случај се води постапка и верувам дека ќе има завршница. Исто така жалам и за она што се случи надвор, кога еден функционер на опозицијата, актуелен градоначалник се обиде физички да нападне новинар. Треба да се осудат настаните што се случуваа внатре, но и надвор од парламентот“, рече Груевски.

На ваквиот одговор реагираше Алиу, кој рече дека е целосно неодговорно премиерот само да искажува жалење за овој случај и ништо повеќе.

„Жалењето е ваша интимна работа. Нас не не' интересира дали жалите или не. Граѓаните од вас бараат одговор што презедовте изминативе денови за овој случај“, повтори Алиу.

Вчерашната седница на Собранието беше прва по бојкотот што го најавија пратениците од СДСМ и нивните коалициски партнери, откако насилно беа истерани од пленарната седница на која беше усвоен буџетот за следната година. Нивниот потег го следеа и двајцата пратеници од НДП на Руфи Османи. Единствена опозиција во собраниската сала се пратениците од ДПА, кои вчера порачаа дека тоа не е нивна битка, дека тоа не е битка на Албанците и затоа остануваат во парламентот.