(Не)дипломатски тон кон опозицијата

Министерот за надворешни работи, Никола Попоски, го оцени бојкотот на опозицијата како незрелост од која најмногу ќе профитира Грција

Слободанка Јовановска

„Почитувани пратеници“ - беа зборовите со кои Антонио Милошоски ја отвори расправата во Комисијата за надворешна политика - прв настан откако тие од опозицијата насилно беа исфрлени од парламентарната сала. Преполовени пратениците сепак жестоко дебатираа, за да покажат дека состојбата е редовна, при што ја повикаа опозицијата на зрелост и на заедничко работење, за да не губи државата во евроинтеграцијата. Главниот адут притоа беше дека Грција е таа на која ситуацијата во Македонија најмногу и' одговара, а шефот на дипломатијата Никола Попоски тоа го кажа најексплицитно, нагласувајќи дека единствена вест за Македонија што се пробила во грчките медиуми била токму најавата за блокада на парламентот.

„Првата забелешка што кој било независен набљудувач однадвор би ја имал во врска со ова прашање би била незрелост, односно неположување на тестот по однос на свеста дека во една демократија несогласувањата и проблемите се решаваат во рамките на институциите. Жалам што денеска нема претставници на опозицијата, бидејќи ова е форумот на кој треба да дадам отчет што направила извршната власт и што може да се направи за остварување на стартешките цели во идниот период меѓу извршната, законодавната власт и сите политички сили во државата“, одговори Попоски околу тоа како бојкотот ќе се одрази на нашето досие во ЕУ.

Според него, со ваков пристап губат сите, од аспект на дебатата во институциите, и од аспект на перцепцијата што се креира надвор, а добиваат оние кои имаат интерес да најдат изговор за неподдржување на таквите процеси.

„Не би го занемарил фактот што единствено оваа вест го привлече вниманието во грчката медиумска сфера, за ра��лика од какви било прекршувања на меѓународното право во изминатиот период. Единствена вест која се проби во Грција, а доаѓа од Македонија е токму најавениот бојкот и покажаната незрелост во таа дебата“, одговори Попоски на ова пригодно прашање. Овој видлив обид да се смени темата во јавноста тој и Милошоски го засилија со прогнозирања дали кипарскиот претседател би отишол попрво во Анкара отколку грчкиот лидер во Македонија, па како поверојатна дестинација се спомна и Антарктик. Силвана Бонева, пак, беше убедена дека инцидентите ќе се надминат и дека опозицијата ќе се врати во парламентот и сите заеднички ќе продолжат да работат во интерес на земјата.

„Јас останувам убедена дека тоа ќе се случи во периодот што е пред нас и дека самите нема да си правиме штета на себе. Останувам убедена дека сите заеднички ќе работиме во наредните три месеци за утврдување на преговарачката рамка и незагрозување на позициите на нашата земја за да добиеме датум за преговори“, порача таа, нагласувајќи дека не смее да се дозволи политичкиот критериум да стане повторно главен услов од ЕУ.

На Комисијата министерот Попоски ги презентираше активностите во надворешната политика годинава и плановите за идната, со две куриозитетни оцени - дека споделуваме „заеднички вредности“ со НАТО, па треба да добиеме членство и дека годинава било забележано „високо ниво на дијалог и успешна соработка со САД“, иако вестите во медиумите беа колкупати не' заобиколуваа нивните функционери. Притоа Попоски оцени дека не се остварени и натаму очекувањата дека Хашката пресуда ќе ни отвори можност за членство во НАТО, а дека бугарското јавно изразување несогласување околу препораката на ЕК за Македонија било изненадување и за нас и за меѓународниот фактор. „Преземаме конкретни чекори за унапредување на меѓусебните односи“, рече Попоски, додавајќи дека очекува во најскоро време тоа да резултира со упатува��е порака за поддршка од бугарска страна.

Околу можноста поради намалениот буџет МНР да затвори некоја амбасада, Попоски одговори дека тоа би била последната работа што би ја направиле, ако веќе мора по кастрењата на платите на дипломатите и на нивниот број надвор и по кратењето на трошоците што беа направени годинава. „Да, други земји го намалија бројот на амбасадите, но тие се членки на ЕУ и на НАТО. Ние тој успех не можеме да го постигнеме без да бидеме присутни надвор“, тврдеше тој, па соопшти дека идната година ќе отвориме и нова амбасада во Токио, зашто Јапонија не' признала под уставното име и е важна за економската дипломатија.