Даниел Сервер: Буџетот не е Дедо Мраз

Ако Македонија не добие добро владеење, според аналитичарот од САД, нема надеж за членство во ЕУ и во НАТО

Слободанка Јовановска


„Некој мисли дека државниот буџет е како Дедо Мраз и' дава неограничени подароци“, е првата оцена на Даниел Сервер, аналитичар од САД, на политичката криза предизвикана од блокадата на буџетот и случувањата во македонскиот парламент.

Сервер, кој е добар познавач на состојбите во регионот и неодамна беше гостин во Македонија и примен од државниот врв, смета дека ако Владата и опозицијата не седнат и ја завршат тешката работа на добро владеење, нема надеж за членство во ЕУ и во НАТО.

„Најважната работа е Владата и опозицијата да се вратат на тешката задача на владеење и добро владеење. Ако го сторат тоа, овој инцидент нема да значи многу. Ако не го сторат, нема надеж за членството во ЕУ и во НАТО, со или без инциденти од ваков тип“, одговори Сервер на прашањето каде го гледа решението од актуелната политичка криза во земјата. Прашан што би кажал за земја во која парламентарците ги исфрлаат насила од парламент како тука, се тепаат и понижуваат, и дали бојкотот на институцијата е соодветен одговор на тоа, Сервер одговори: „Не мислам дека со бојкот на парламентот се постигнува многу. Би ја оставил таа одлука на луѓето кои се директно инволвирани во овој случај, но искуството од секаде сугерира дека тоа само го остава мнозинството на власта да прави што сака“. Според Сервер, ваквата состојба сигурно ќе влијае на евроатлантската интеграција на земјата, што тој ја оцени како „прекин на граѓанските релации во парламентот и надвор од него“.

Не е добро за членството во НАТО и во Европската унија да се поминува низ ваков прекин на граѓанските релации во парламентот и надвор од него.

„Не е добро за перспективите во ЕУ и во НАТО да се поминува низ ваков прекин во граѓанските релации во парламентот и надвор од него. Невообичаено е исто така - и јас се сомневам дека некој во ЕУ ќе го смета тоа за вредно да се плати цена - опозицијата да сака да ги кастри трошењата“, додава Сервер.

За настаните во Македонија се огласи на „Твитер“ и еврокомесарот Штефан Филе, кој порача дека политичките несогласувања не треба да се решаваат со насилство и не треба да влијаат на работата на новинарите. Место тоа, тој ги повика политичките актери во земјата заеднички да најдат решенија за отворените прашања, предупредувајќи дека оваа пролет ќе биде одлучувачка за европската перспектива на Македонија.

За настаните во Македонија се огласи и ексамбасадорот Ерван Фуере, кој оцени дека традиционалната порака во ваков празничен период, т.е. мирот и толеранцијата, ја одминала Македонија овие денови.

„Шокантните сцени на насилство во Собранието можеби се очекуваат од Белорусија, но сигурно не е од земја-кандидатка за влез во ЕУ. Ова е директен резултат на неуспехот на Владата да се вклучи во каков било суштински политички дијалог. Кога се случи последниот состанок на лидерите? Зошто ДУИ е толку тивка околу ваквото насилство, иако како партија во минатото протестираше силно кога чувствуваше дека нејзините права беа прекршени?“ е реакцијата на Фуере.