Димитар Башески излезе од ДПМ, но и ДПМ го поддржа ЗНМ



Друштвото на писателите на Македонија денеска го поддржа ЗНМ во реакцијата по нападот со Собранието

Друштвото на писателите на Македонија денеска го поддржа Здружението на новинарите на Македонија во реакцијата по нападот со Собранието, откако ден претходно, во знак на протест поради недавање поддршка оставка поднесе писателот, Димитар Башевски. Одлуката да го напушти ДПМ во кое членуваше повеќе од 40 години, Башевски ја донел во знак на протест бидејќи како што стои во писмото насловено со „Драги колеги“, до моментот кога се одлучил на таков чекор, ДПМ не се огласил.

„Не се огласуваше со ниту еден збор на поддршка на своите колеги новинари (најголемиот број од нас писателите според работната кариера сме всушност новинари) кои, спротивно не само на Уставот и законите во земјата, туку и на сите меѓународно прифатени норми кога е во прашање слободата и независноста на новинарството, со употреба на физичка сила беа исфрлени од Парламентот на Република Македонија, додека си ја извршуваа својата професионална работа“.

Јас со овој чекор, вака сам, му ја изразувам мојата поддршка на Здружението на новинарите на Македонија и на македонските новинари воопшто, на оној број професионалци и слободољубиви луѓе кои бараат и имаат право да добијат одговор за насилството извршено врз нив и врз слободата на информирањето. Овој мој чекор не е повеќе отколку еден обид да дадам знак дека сум меѓу оние кои одбиваат да се согласат со задушувањето на слободата воопшто и посебно на слободата на говорот. Тоа е главната битка што ја води и Меѓународниот ПЕН, во која во една мера, како долгогодишен претседател на Македонскиот ПЕН и како сегашен почесен претседател, сум учествувал и учествувам. Далеку од тоа да се послужам со онаа подзастарена и патетична крилатица дека писателите се совест на народот. Никој нема право да биде совест на народот ниту совест на било кој друг, секој си ја имаа својата сопствена совест, стои во писмото на Димитар Башевски испратено вчера вечер во редакцијата на „Утрински весник“. (К.Б)

ДПМ целосно ја поддржува реакцијата на ЗНМ

„ДПМ дава целосна поддршка на реакцијата на Здружението на новинарите на Македонија во одбрана на слободата во извршувањето на професионалните обврски и слободата на изразување. Друштвото се придружува на барањето на ЗНМ за брзо и целосно расчистување на случајот што е без преседан и остава негативни и непредвидливи последици за демократските процеси во земјата“, се вели во соопштението на писателската асоцијација чии членови напоменуваат дека во основа на нејзиното практично дејствување стои дека „тешко на таа средина во која владеат интелек��уалци молчаливци, луѓе без став, без опција, без идеја водилка”.