Долгот кон фирмите бил 92 милиона евра

Премиерот соопшти дека исплатиле 68 отсто од долгот, а остануваат уште околу 30 милиони евра

Соња Маџовска



Премиерот Никола Груевски вчера прв пат објави бројка за тоа колку Владата му должела на стопанството. Сумата во септември изнесувала над 92 милиони евра, а веќе се исплатени 68 отсто од нив, одговори премиерот во Собранието на пратеничкото прашање на неговиот сопартиец Васко Пашкоски. Ова значи дека премиерот, конечно, ја откри една од најстрого чуваните тајни во земјава, а излегува дека се' уште на фирмите им должат уште околу 30 милиони евра, кои треба да им ги исплатат до февруари.

„На 16 септември неплатените обврски изнесуваа 5 милијарди 560 милиони денари, или околу 92 милиони евра, а во моментот изнесуваат 1 милијарди 815 милиони денари, или околу 29,5 милиони евра. Неплатените обврски по рокот на доспевање имаат драстично намалување за 68 проценти и е во согласност со она што го ветив во моето јавно обраќање пред стопанствениците. Остануваме на нашето ветување дека до крајот на февруари ќе биде елиминиран овој проблем“, рече Груевски.

Ветувањето за исплатата на долгот кон фирмите премиерот го даде на крајот од септември, по алармот од бизнисмените дека се дават во неликвидност поради неисплатени обврски по основ на ДДВ и други реализирани проекти. Но, и тогаш не беше соопштена сумата за тоа колку изнесува вкупниот долг на државата кон фирмите. Најчестиот изговор и на министрите и на премиерот досега беше дека таа сума се менува на дневна основа и затоа не е благодарно да се соопштува.

Пораката на бизнисмените и на меѓународните финансиски институции, откако Владата почна да ги исплаќа заостанатите обврски, беше дека не треба да се повтори таа ситуација, и што е најважно Министерството за финансии да воспостави систем со кој нема повторно да има трупање на неисплатени обврски.

Министерот за финансии Зоран Ставрески неодамна во интервју за „Утрински весник“ вети дека парите на фирмите ќе им бидат исплатени заклучно со февруари, но дека Владата воспоставила систем, со конкретни инструкции до државните институции и до корисниците на буџетските средства за тоа како ќе тече исплатата за да не дојде до повторно акумулирање долгови.

„Да, има системски промени и во тој дел е променето трезорското упатство. На буџетските корисници им се дадени инструкции планирањето на средствата да биде во согласност со обезбедениот буџет за следната година, да не се планираат проекти кои го надминуваат тој буџет. Буџетот и трезорот стриктно нема да примаат налози за плаќања доколку тие не се испланирани и не се во дадените рамки. Тоа се системски мерки што ги презедовме“, изјави Ставрески.