И синот на Црвенковски на барикадите

Синот на Црвенковски, Љупчо, има 22 години и беше прв до својот татко кога се пробиваше барикадата на полицијата

Љупчо Црвенковски, синот на лидерот на СДСМ, на понеделничките протести беше рамо до рамо со својот татко Бранко Црвенковски. Во моментите кога лидерот на опозицијата ги поведе своите приврзаници да ги урнат барикадите и полицискиот кордон, 22-годишното момче беше во првиот ред во групата.

Објективот на фоторепортерот на „Утрински весник“ го забележа Љупчо уште на самиот почеток на протестите. Тој цело време беше до својот татко, дури и во моментите кога го пробија кордонот и кога полицијата интервенираше. Тој досега не беше политички активен и не можеше да се забележи на политички настани. Ова е прво негово појавување во јавноста во политички контекст, со кое јавно ја манифестираше поддршката што му ја дава на својот татко.

Синот на опозицискиот лидер, кој се роди во моментите кога се градеше самостојна Македонија, денеска е студент, со очигледно јасни политички ставови. Студира на Економскиот факултет на Универзитетот „Св. Кирил и Методиј“.

Според податоците од неговиот профил на „Фејсбук“, тој денеска полни 22 години. Бидејќи за денеска опозицијата предводена од СДСМ најави протест пред седиштето на ВМРО-ДПМНЕ, не е исклучено Љупчо својот роденден да го прослави пред седиштето на оваа владејачка партија, спротивставувајќи се на нејзината политика. (Т.П.)