Опозицијата ја одби поканата на премиерот за враќање во парламентот

Во опозицискиот СДСМ сметаат дека Владата со своето однесување покажала дека нема капацитет за организирање фер и демократски избори

Љубиша СтанковиЌ



Премиерот Никола Груевски во своето новогодишно обраќање ја повика опозицијата да се врати во парламентот и да земе учество на локалните избори напролет. Но, ваквата понуда вчера експресно ја одбија социјалдемократите, со образложение дека тоа ќе остане само пуста „новогодишна желба“ на премиерот, а учеството на изборите ќе зависи од тоа дали изборниот законик ќе биде променет во согласност со препораките на ОБСЕ/ОДИХИР и со прочистен избирачки список.

Крајно исполаризираните ставови, кои се дојдени на ниво на исклучивост, уследија по настаните кои се случија во републичкото Собрание, на 24 минатиот месец, а за кои случувања ВМРО-ДПМНЕ има свое, а СДСМ сосема поинакво видување.

Имено, во обраќањето на премиерот Никола Груевски, кое доаѓа на само петнаесетина дена пред распишување на локалните избори, вината за последните настани се лоцира на контото на опозиција. Тој потенцираше дека крајот на годината донел голема непријатност и тежок ден за Македонија и оти постоел неуспешен обид за заземање на Собранието.

„Пред неколку дена беше спречен обид за насилно заземање на парламентот и погазување на волјата на гласачите од последните парламентарни избори, од пред година и пол. За среќа, иако со последици за угледот на државата, Македонија не дозволи уривање на долго градената демократија и легитимно избраната власт на слободни и фер избори, ниту пак блокирање на земјата и штети врз граѓаните со неизгласување на буџетот“, рече Груевски во своето новогодишно обраќање и додаде дека: „носителите на овој недемократски чин имаат шанса да повратат дел од загубениот углед на земјата доколку набрзо се вратат во парламентот и учествуваат на следните локални избори, кои мора и ќе бидат како и претходните фер, слободни и демократски“.

Како што сега стојат работите, желбите и заложбите на премиерот Груевски ќе останат само желба, доколку се следат изјавите кои доаѓаат од таборот на најголемата опозициска партија.

„Премиерот Груевски може да има какви сака новогодишни желби. Ние, во повеќе наврати, кажавме дека на избори може да се оди само со променет изборен закон и со пречистен избирачки список, според препораките на ОБСЕ и ОДИХР“, ни изјави потпретседателот на СДСМ, Гордан Георгиев.

Пренесувајќи го ставот на СДСМ, Георгиев вели дека по настаните од 24 декември, Владата само го покажала своето насилничко однесување и затоа тие не веруваат дека оваа Влада е подготвена да организира фер и демократски избори. Имено, за СДСМ, случувањата во и пред самото Собрание, се доволен мотив нивните пратеници повеќе да не учествуваат во неговата работа. Всушност, во СДСМ остануваат на тоа дека тие својот револт за случувањата и натаму ќе го изразуваат со улични протести, но не ја исклучуваат и можноста протестите да добијат некаква нова форма.