Интервју - Зоран Заев: Локалните и��бори зависат од власта

Очекувам фер борба, натпревар на идеи и проекти и победа со разлика од 10 илјади гласа

РИСТО ТАСЕВ


Кои се најголемите проблеми со кои се соочува Струмица?

Најголем проблем на Струмица е (не)поврзаноста со останатиот дел од светот. Нашата општина ќе беше далеку попросперитетна доколку Владата го завршеше својот дел од обврските. Зборувам за патот Струмица - Радовиш, за Валандовско Брдо, кои, пред се', ни се потребни за натамошен развој на економијата. Само од извоз на земјоделски производи во Струмичко влегуваат околу 120 милиони евра, а тие се многу значајни за трговскиот баланс на државата и за вкупниот економски развој. Ова е јасна и конкретна причина зашто треба да се подобри патната инфраструктура. Тоа е најголемото прашање за кое треба да бидат заинтересирани струмичани.



Што беше најголем предизвик за да се кандидирате за трет мандат и на кој проблем ќе му дадете приоритет при решавањето, се разбира доколку повторно ја освоите Струмица?

Јас сум осум години градоначалник. Покажав и докажав кој сум. Струмица по многу нешта е прва во Македонија. Предизвикот во следниот мандат ќе биде економијата. Прашањето кое постојано си го поставувам пред себе е: како можеме економски уште повеќе да придонесеме за квалитетно подобрување на животот на граѓаните. Со постојните ресурси и со наредните фази на децентрализацијата, со европската перспектива која ја има цела Македонија, а со тоа и Струмица, сметам дека како градоначалник ќе имам можност да покажам решенија и од економска природа, кои ќе значат нови работни места, инвестиции, но и нови даноци за државата и за Општината, нов развој и раст на Струмица.



Колку финансиската независност на локалната самоуправа му ја олеснува или отежнува работата на градоначалникот доколку не е од иста политичка партија со централната власт?

Во овие осум години колку што ја водам Струмица, централната власт е седум години од спротивниот табор. И покрај тоа, Струмица е најуспешна општина во државата. На маката се гледа колку луѓето ги бидува. Во овој период кога власта одмагаше, не' стави во состојба повеќе да размислуваме, повеќе да работиме и да се трудиме, но и да покажеме повеќе резултати. Тешко е кога гледате дека државата за едни општини е мајка, а за други маќеа. Но, кога гледате на среден рок, осознавате дека многу побрзо созреваат капацитетите на една општина кога сте оставени сами. Струмица е единствена општина која не зема кредит, бидејќи Владата не даваше согласност. Јас правам и една друга споредба: Општина Струмица се натпреварува со целата Влада и таа каска зад нас. Владата гради со кредити, Струмица со сопствени средства. Ние ја изградивме првата катна гаража и, ете, Владата почна да гради такви во Скопје. Почнавме плоштад, по нас тргна и Владата, градиме црква во која досега се инвестирани 700.000 евра, Владата става камен-темелник на црква во Скопје. И најсреќен сум, еве изградивме гасовод, а државата дебатира и тендерира за гасовод. Каде ќе и' беше крајот на Струмица ако оваа Влада барем малку и' помогнеше на Општината.



Струмица е рак-рана на владејачката партија која во два наврата катастрофално ја поразивте. Што очекувате од оваа изборна пресметка со противкандидатот на ВМРО-ДПМНЕ?

Јас ниту сум скромен човек ниту сум претенциозен оптимист. Имам противкандидат. Тоа е Васил Пишев. Никого не потценувам. Тој е кандидат за градоначалник не на која било општина, туку на Струмица. Го респектирам и го почитувам, но и настапувам со претпазливост. Доаѓа од голема политичка партија која ја води државата. Иако сите анкети покажуваат кој е фаворит во нашата општина, очекувам фер борба, натпревар на идеи и проекти, бидејќи само така и двајцата ќе можеме да оставиме добар впечаток за да можат граѓаните да донесат мудра одлука. Тоа што за мене претставува очекување е следното: ако во 2005 година победив во прв круг со 17.000 гласа, ако во 2009 година, кога секаде победуваше ВМРО-ДПМНЕ, јас победив со разлика од 7.500 гласа, сакам да го задржам овој тренд. Очекувам победа со разлика од 10.000 гласа.



Што ќе им ветите на струмичани, што да очекуваат од Зоран Заев од евентуален трет мандат?

Моите ветувања за трет градоначалнички мандат се во согласност со созреаните очекувања на Струмица и струмичани. Кога давате многу, луѓето очекуваат уште. Така што и понудата ќе биде уште повеќе од тоа што е направено. Затоа велам дека ќе влезам во битка со економски менаџмент. Ќе помогнам таму каде што најмногу боли. Но, тоа не е доволно. Граѓаните очекуваат и капитални проекти, очекуваат динамичен развој, што значи модернизацијата на Струмица мора да продолжи, и тоа како на градот така и на населените места. Имам многу проекти, но би ги издвоил трендот на отворање индустриски зони, развој на туризмот, подземна сообраќајна инфраструктура која ќе го спои едниот со другиот дел на градот, Цареви кули како вековно наследство на градот, кој ќе биде целосно обновен и, секако, развој на секое населено место, за што имам подготвено посебни проекти.



Колку последните настани во и пред парламентот, особено Вашите изјави дека ќе се пука на изборите ќе влијаат на позицијата на Заев? Сметате ли дека тоа ќе Ви го намали рејтингот, или можеби уште повеќе ќе Ви ја зацврсти позицијата во Струмица?

Последните случувања и изјави, секако, дека имаат своја рефлексија врз мислењето кое го имаат граѓаните за мене како политичар и градоначалник на Струмица и тие тоа свое мислење ќе си го кажат во првата шанса кога ќе ја имаат. Лично мислам дека јас не сум ново лице, сите добро ме познаваат, знаат што душа носам, како работам и по какви дела сум познат. Одлуките да излезам пред полицијата се одлуки на нормален човек кој добил информација дека во парламентот ги удираат и ги влечат неговите пријатели на недостоинствен и на неморален начин. А, за изјавата дека ќе има пукање, јас навистина нема да бидам изненаден од оние кои удрија врз пратеници во парламентот, врз лидерите на опозицијата надвор од парламентот и да пукаат по неистомислениците.



По познатата изјава „ќе јадеме живи луѓе“, сега дојде и ова со пукањето. Зошто излегуваат такви, за многумина непромислени изјави од Вас, особено што сте искусен политичар, веќе една деценија сте во политиката, а имате и висока функција во СДСМ? Дали Заев има конфликтен карактер?

Валканите сценарија на владејачката гарнитура, со кои се обидуваат да ме прикажат во поинакво светло, нема да им успеат колку и да се обидуваат. Преголеми се добрите дела поврзани со мене, премногу докази има околу мене, за некој да тврди дека Заев е лош човек. Изјавите за кои зборувате, треба само да се слушнат целосно, без да бидат селективно прикажани во делови. Не треба да се биде нешто посебно паметен за да се сфати намерата на зборовите кои се составен дел на тие изјави. Во нив е присутен стравот во мене дека е можно во иднина некој да пука по нас, неистомислениците со власта. Присутна е пораката дека никој нема право, без разлика на која политичка партија припаѓа, да не му дозволи на родителот да го лечи своето болно дете само поради тоа што не е поддржувач на власта, никој нема право да ја укине социјалната помош од 2.000 денари само поради тоа што некој не ја поддржува власта. Јас стојам зад моите изјави и не бегам од нив. А, за мојот карактер, не е во ред јас да зборувам, зашто го знаат сите во оваа наша мала земја. Само ќе кажам дека јас сум тоа што го работам за моите сограѓани, моите дела, моето секојдневје е доказот за мојот карактер. Прашајте во Струмица каков сум јас и сите чесни луѓе ќе ви ја кажат вистината.



Дали по се', СДСМ ќе учествува на претстојните избори и дали Зоран Заев останува на кандидатурата за градоначалник на Струмица?

Секако дека останувам на кандидатурата. И не само тоа, јас сум сигурен дека ќе ја добијам поддршката од струмичани и ќе победам со многу голема разлика. Впрочем, тоа можете да го препознаете и од мојот противнички политички табор - Струмица им е однапред предадена. Сите подготовки за изборите јас и мојот изборен штаб целосно ги реализираме. Подготвуваме исклучително позитивна кампања со многу убави проекти и програми. А, тоа, дали ќе учествуваме на изборите, зависи од власта. Таа е најповиканата и најодговорната страна која треба да создаде достоинствени услови за фер и демократски избори. Власта едноставно треба да ги прифати препораките на ОБСЕ и ОДИХР за да можеме да излеземе на демократски избори. Состојбите во земјата предизвикани од случувањата на 24 декември се посебна обврска на власта и за нив таа треба под итно да се зафати со изнаоѓање решение.