Поглед

Земјоделци и лицемери

Сања Наумовска

Распределбата на земјоделските субвенции, која требаше да се доуреди со дополнување на Закон за земјоделство и рурален развој, деновиве направи хаос во парламентот и предизвика лавина на препукувања меѓу власта и опозицијата, но и меѓусебно ги раскара земјоделците.

Кој како гласал и од кои причини, кој кому подметнува и зошто, кој се грижи за земјоделците, а кој е лицемер. Пинг-понг на релација власт - опозиција од изјави и обвинувања. На јавноста не и' преостанува ништо друго освен на секој час да чита ново соопштение, а по некој во меѓувреме можеби и ќе разбере по нешто од политичките игри врз грбот на земјоделците.

Накратко, најголемата политичка партија во власта ВМРО-ДПМНЕ предложи измени и дополнување на Законот, за кои нејзиниот коалициски партнер во власта ДУИ гласаше против. Опозицискиот СДСМ на гласањето во парламентот беше воздржан и измените не поминаа. Сепак, вината за тоа не ја поделија двете партии, туку само опозицијата го собра бесот на политичките противници. Ја нападнаа и земјоделските здруженија бидејќи многу од нивните предлози воопшто не дојдоа на разгледување пред пратениците.

За социјалистите, СДСМ покажала лицемерие и лажна грижа за земјоделците. Опозицијата, пак, вели дека владејачката ВМРО-ДПМНЕ сама си е виновна што на собраниската седница и' недостасувале 16 пратеници, со кои, без гласовите на ДУИ и опозицијата, измените ќе поминале. Тоа, според опозиционерите, отвора сомневање дека најголемата партија во власта самата имала намера да си го минира гласањето. Како одговор на тоа, пак, власта најави нови предлози за измени на законот. Истото го најави и СДСМ.

Препукувањата меѓу политичарите продолжуваат. На земјоделците деновиве им останува само да ги дооберат пиперките. Бостанот одамна го обраа.