Македонија ќе се приклучи кон „Јужен поток“

Тоа ќе се овозможи со спогодбата за клириншкиот
долг што утре ќе ја потпишат Македонија и Русија

Се наѕира ли, конечно, стартот на гасификацијата на земјава преку евентуално затворање на клириншкиот долг со Русија? Такви надежи разбуди посетата на македонската делегација на Русија овие денови.

Дека Македонија може да му се приклучи на значајниот меѓународен транзитен коридор „Јужен поток“ преку изградба на крак низ македонска територија, била една од темите на вчерашната средба во Санкт Петерсбург меѓу претседателот на Македонија, Ѓорге Иванов, вицепремиерот Зоран Ставрески и генералниот директор на „Газпром“, Алексеј Милер. Тие констатирале дека претстојното потпишување на спогодбата за клириншкиот долг меѓу Русија и Македонија најавено за утре ќе создаде услови за учество на „Газпром“ во изградбата на македонската гасоводна мрежа.

„Потпишувањето на спогодбата ќе овозможи унапредување на соработката меѓу Македонија и Русија во енергетскиот сектор. Со тоа се создадени услови ’Газпром‘ да учествува во изградбата на гасоводната мрежа во земјава, за што двете страни покажаа целосна подотвеност за соработка“, соопштија вчера од кабинетот на Ставрески.

Иванов, Ставрески и Милер разговарале и за можноста за партнерство меѓу „Газпром“ и Македонија во изградба на гасни електрани.

„Договорено е експертски тимови на ’Газпром‘ и на Владата веднаш да почнат да работат на усогласување на техничките работи околу изградбата на електрани на гас“, се нагласува во соопштението од Владата.

Инаку, во 2007 година „Газпром“ и италијанската компанија ЕНИ потпишаа договор за реализација на проектот „Јужен поток“. Проектот опфаќа систем од нови гасоводи, кои ќе ја поврзат Русија со Европа преку дното на Црното Море. Сосема извесно е дека гасоводот ќе минува низ Бугарија и низ северниот дел на Грција, бидејќи овие две земји веќе на државничко ниво изразија спремност за вклучување во проектот и за потпишување договори. Можноста за приклучување и на други заинтересирани земји никогаш не била исклучена од страна на руската компанија. И соседна Србија лани преговараше со Русија за изградба на еден крак, како дел од овој меѓународен гасовод што би поминувал низ таа земја.

На меѓународниот економски форум во Санкт Петерсбург учествуваат најпознатите политички лидери, интелектуалци и новинари, избрани да разговараат за најактуелните прашања со кои се соочува светот. Меѓу темите на форумот се финансиите по кризата, глобалната енергија и иднината на пазарот за гас, предизвиците на пензискиот систем во 21 век и други теми од економијата. (М.Т)