„МАРС 2010“

Триумф на Влатко Илиевски и „Среќа“

Композицијата „Среќа“ на авторите Владимир Дојчиновски и Весна Малинова, несудениот евровизиски претставник, поп-пејачот Влатко Илиевски, ги дочека своите пет минути слава, триумфирајќи на завчерашното, трето издание на Македонскиот радиски фестивал „МАРС 2010“, што се одржа во Универзална сала во Скопје.

Илиевски, кој е двократен победник на МАРС (лани триумфираше со песната „Најбогат на свет“), го има најголемиот радиски хит за 2010 година, награда од 60.000 денари и бесплатно користење на Универзална за организирање солистички концерт.

Како второпласирани, според гласовите на публиката дадени по пат на телевоутинг, се најдоа близнаците Мартин и Стефан од дуото „Некст тајм“, кои со темата „Убава“ освоија и парична награда од 40.000 денари, додека на трето место се најде Александар Белов и „Една“, што му донесе и финансиска поткрепа од 30.000 денари.

Елена Ристеска и нејзината „А можевме“, песна сместена на компилациското цеде „Тоше и пријателите“, беше прогласена за ФМ-хит на годината. Статуетата, како што изјави Ристеска, му припаѓа на Тоше зашто е прва награда за композиција што самиот ја напишал и која, како што рече, лично ќе ја однесе во неговата спомен-куќа во Крушево. Ова признание и' донесе и 30.000 денари и бесплатен концерт во Универзална сала.

Меѓу наградените на завчерашната манифестација се најдоа и поп-дивата Калиопи, која го доби специјалното признание за популаризација на македонската музика во земјава и надвор од неа, а „удостоени“ беа и гостите од Србија - Жељко Самарџиќ и Жељко Васиќ. Наградата „Ѕвезда што се раѓа“ му припадна на младиот пејач Дарко Илиевски.

За најдобар текст беше прогласен „Едно тело“ на Магдалена Цветковска, а во изведба на Дарко Илиевски и ДНК. Наградата ја доделија естрадните новинари, а таа и' донесе и 10.000 денари на најуспешната текстописка. (К.Ш.)