Ќерка ја чувала својата мртва мајка во стан еден месец

Обдукцијата покажала дека жената е убиена со удар од тврд предмет

Непријатна и тешка миризба откри убиство во скопската населба Маџари. Ќерка речиси еден месец ја чувала својата мртва мајка во нивниот стан на улицата „Карл Либкнехт“, во зградата број 67. Од приземјето на двокатницата со недели доаѓала непријатна миризба. Соседите ја чувствувале реата, но никој од нив не помислил за кошмарот што се случувал во нивното соседство. Од полицијата се' уште не потврдуваат дали станува збор за убиство, но резултатите од обдукцијата потврдија – жената починала пред еден месец, како резултат на удар со тап предмет.

Според информациите од полиција, станува збор за 69-годишната Анастасија Караманова, која била пронајдена мртва во својот стан, во кој живеела со ќерка си, 42-годишната Р.К., која имаме психички проблеми. Случајот бил разоткриен по пријава на еден од соседите, кој завчера околу 11 часот се пожалил на многу силна и непријатна миризба што доаѓала од станот. Кога полицијата влегла внатре, го затекнала телото на починатата, кое било во фаза на распаѓање.

Првиот човек на Институтот за судска медицина, Алексеј Дума, вели дека телото на починатата жена завчеравечер било донесено на обдукција. Форензичките анализи покажале дека станува збор за убиство што било извршено најверојатно уште пред еден месец. Толку време жената лежела во станот по убиството, кое според форензичарите било извршено со удар од тап предмет.

Вчера напладне, во моментот кога го посетивме местото каде што била пронајдена мртвата жена, во тек беше увидот од страна на крим–техника на полицијата. Соседите раскажуваат дека жената живеела на приземје на двокатната зграда во скопската населба Маџари. Според нив, починатата била витална жена, и често и среќавале во соседството. Меѓутоа, од пред извесно време, никој од нив ниту ја видел ниту знаел што се случува со жената. Сомнежот пораснал кога почнала да се шири непријатна миризба, која ја забележале станарите, но никој не можел да претпостави што се случува во соседството. (Д.Т.)