ЕДИТОРИЈАЛ

Ја покажаа моќта под закрила на ноќта

Соња Крамарска

Драматична ноќ се случи во Македонија. Национална телевизија беше под налетот на брутални полициски сили. Избезумени новинари, шокирана јавност, вжештени телефонски линии. Веста за упадот во А1 стана предмет на светски интерес. Глобални телевизиски мрежи пренесоа дека полицијата во Македонија врши претрес во една национална телевизија и дека тоа е притисок врз слободата на медиумите.

Сопственик на А1 е Велија Рамковски. Дводецениски, некои велат, сомнителен бизнисмен, кој со помош на медиумите што ги има во сопственост, одбегнува плаќање данок и други давачки кон државата, но и кон своите вработени. Рамковски е легенда на политичката и на социјалната сцена во Македонија. Сите ја коментираат неговата формула за преживување и правење профити. А таа се сведува на едно: владите го сакаат додека неговата телевизија им е наклонета и затвораат очи пред незаконитостите во неговите компании, а веднаш тргнуваат во преглед на неговите деловни книги кога Рамковски и неговите медиуми ќе им го свртат грбот. Тогаш тој се жали на политички притисоци, а Владата, пак, приговара на пристрасност на неговите медиуми.

Ние ги поддржуваме нашите колеги од А1 телевизија и од весниците „Шпиц“ и „Време“, кои беа предмет на полициска обработка завчеравечер. Јавно ја изразуваме нашата вознемиреност и загриженост за иднината на медиумите во Македонија, ако продолжи таквиот тренд на притисок и обид за задушување на јавната критика. Принципиелно застануваме зад слободата на новинарскиот збор и апелираме до Владата да престане со притисоците врз медиумите.

Завчерашната драматична ноќ на местото кое од новинарите од медиумите на Рамковски цинично се нарекува „кванташки пазар“ има најмалку три посебни аспекти. Првиот се матните бизниси на Рамковски, вториот е бруталниот полициски упад во А1 и третиот е личната битка меѓу некогашните содружници Никола Груевски и Велија Рамковски. Сите тие аспекти се обединети во прексиноќешната „ноќ на долги ножеви“ во просториите и во дворот на А1 телевизија.

Се' додека Зоран Ставрески беше редовен гостин на емисијата „Фармер“, Управата за јавни приходи не ја интересираше како Рамковски прави пари. Тој ни тогаш не ги правеше парите на Њујоршката берза. Ги правеше во Македонија, помалку или повеќе со истите методи со кои ги прави и денеска. Со заобиколување на правилата што владеат на медиумскиот пазар и со грубо пазарење со властите.

Ќе видиме дали Рамковски ќе го плати својот долг кон Управата за јавни приходи или, пак, ќе му надомести на Груевски на друг начин. Тонот и начинот на известувањето на А1 отсега, па натаму ќе покажат која од двете варијанти се случила. Дали платил Велија или платила А1.

Но, исто така, ако Владата е принципиелна во фискалното дисциплинирање на медиумските газди, очекуваме даночната полиција деновиве да влезе и кај коалициските партнери на Груевски, кои се сопственици на други телевизии. Ич да не се плашат ако има отпор, нека ја викнат полицијата да им асистира.

Во развиени демократски држави министер за внатрешни работи веднаш поднесува оставка по таков скандалозен упад во независна телевизија. Замислете, Скотланд јард да ги окупираше медиумите на Руперт Мардок во Лондон кога се открија неговите даночни малверзации. Или Барак Обама да ја испрати ФБИ во телевизијата Фокс, која секоја вечер води партиска кампања против него инспирирана од републиканците.

Кај нас, Илија Димоски излегува пред новинари и зборува во име на УЈП. Опасно е кога партија зборува во име на државна институција. Шокантно е да поставите три барикади и десетина полициски одреди околу една телевизија која ја критикува вашата влада. Тоа покажува дека или Владата му се плаши на Рамковски или на сцена стапи провинцијалната желба за покажување сила. Ја покажаа моќта под закрила на ноќта.