Баросо: Еврото нема да умре

Рим - Еврото нема да умре. Тоа е „една од најсилните валути во светот“, изјави претседателот на Европската комисија, Жозе Мануел Баросо. На прашањето дали е можно заедничката европска валута да не преживее, Баросо одговори дека не се согласува со таквата анализа. „Еврото е една од најсилните валути во светот и втора глобална валута“, додаде Баросо, нагласувајќи дека ако се анализираат основите на европската економија, тогаш „ние имаме пониско ниво на задолженост отколку САД и Јапонија“. Претседателот на ЕК се согласи дека „има проблеми со некои земји од еврозоната, но во интерес на сите земји-членки и на оние земји што се надвор од еврозоната, е еврото да биде силно и надежно“. Баросо ја нагласи „решителноста на европските лидери да направат се' што е можно, со цел да се зачува стабилноста на еврото“, повикувајќи се на одлуката донесена во четвртокот во Брисел, на средбата на високо ниво, да бидат објавени резултатите од „тестирањата за стабилност“ на најголемите европски банки. Баросо изрази силно задоволство од фактот дека Европа е во состојба да донесе мерки не само за зајакнување на Пактот за стабилност туку и за напредок за оздравувањето на буџетот. (МИА)