Французи ќе инсталираат фотоволтаични системи во Македонија

Бескрајните потенцијали на сонцето во функција на националната економија

Иван Бојаџиски

СВЕТИ НИКОЛЕ - Фотоволтаични системи за производство на електрична енергија од потенцијалите на сонцето ќе бидат поставени на зградата на Универзитетот на Меѓународниот славјански институт во Битола.

Договор за соработка на ова поле во Свети Николе потпишаа Филип Харел, претседател на бордот директори на француската компанија „Кобсолеја“, една од најпознатите производители во светот на вакви системи, Јордан Ѓорчев, директор на Меѓународниот славјански институт „Гаврило Романовиќ Державин“ во Свети Николе и Андреас Бом, генерален директор на „Глобал енергетски системи“.

„Се одлучивме првите фотоволтаични системи да ги инсталираме на зградата на нашиот универзитет во Битола, на површина од 116 квадратни метри и во тој процес ќе инвестираме 400.000 евра. Во оваа меѓународна соработка гледаме двојна корист. Имено, покрај производство на електрична енергија од 130.000 киловат-часа на годишно ниво, што е вредност од 50.000 евра, со „Кобсолеја“ воспоставуваме односи и во областа на науката. Имено, нивни експерти имаат одлични деловни односи со повеќето универзитети во Европа, а ние планираме, веќе од идната година, на МСИ да формираме факултет за алтернативна енергија, при што најголемиот дел од професорскиот кадар ќе доаѓа од семејството на „Кобсолеја“, вели Ѓорчев.

Филип Харел во Македонија дошол воден од сознанијата дека Владата се' поголем приоритет давала на искористување на алтернативната, обновлива еколошки чиста енергија.

„Правевме долгорочни анализи за можностите на повеќе европски земји за користење на алтернативните енергетски извори. Македонија, со над 260 сончеви дена е една од најподатливите за користење на енергијата на сонцето за производство на струја. Поради тоа, со задоволство ја прифативме иницијативата на Јордан Ѓорчев да оствариме соработка на двете важни полиња-енергијата и науката“, изјави Филип Харел.

Според првиот човек на „Кобсолеја“ во Европа најдалеку во искористувањето на алтернативните, обновливи енергетски извори најдалеку била отидена Германија.

„Во Франција само два процента од енергетските потреби државата ги обезбедува од сонцето, ветерот, биогасот и термалните води, но во последниве години овој процес силно се стимулира и се добива на интензитет. Сегашните, традиционални енергетски извори не се неисцрпни и како цивилизирани луѓе имаме одговорност пред иднината“, вели Харел, кој објаснува дека нивната компанија на ова поле работела во десетина европски држави.

Фирмата „Глобал енергетски системи“, која во Македонија ја води Андреас Бом, ќе работи на реализацијата на фотоволтаичните системи во Битола. Според Бом, нашата држава ги има сите предуслови за развој на оваа технологија, бидејќи сонце имаме во големи количини, само треба решеност тие бескрајни потенцијали да ги ставиме во функција на општото добро на граѓаните и националната економија.