Мотофестивал

Дождот ја намали посетеноста

Мотобратството „Ноќни волци“ викендов го организираше шестиот Меѓународен мотофестивал што се одржа на скопското Кале, каде што под отворено небо се собраа повеќе заштитници на мотокултурата, љубопитни посетители и музички обожаватели.

Музичкиот дел беше резервиран за „Прпл цепелин“, Дани, „Уикеда“, „Брчки“, „Смат“, „Вип“, „Деј оф“ и „Електрични оргазам“. Популарната пејачка Дани и Бугарите „Уикеда“, кои со својот ска-панк манир, иако времето беше дождливо, ја собраа разиграната публика пред бината, приредувајќи им интересно концертно доживување.

Бината беше поткрепена со интересни визуелизации и одлично озвучување, а во просторот на Калето беа ��аспространети голем број штандови со сувенири, ракавици, кожени јакни, алки, марами, различни моторџиски реквизити, но и места каде што присутните можеа да купат пијалак или да пробаат некое парче скара.

Се разбира, насекаде низ фестивалот беа паркирани мотори, чии сопственици се дружеа и се забавуваа пиејќи пиво и слушајќи музика.

Водител беше Игор Џамбазов, а за разлика од минатата години, неколку редовни посетители беа разочарани од посетеноста на фестивалот.

И за крај, да го спомнеме и саботното моторџиско дефиле на „Ноќните волци“, кои возеа од Калето низ скопските улици се' до плоштадот каде што на поставените бисти на Делчев, Груев и на Ченто положија цвеќе. (Б.Ш)