Поглед

Власта глуми опозиција

Гордана Дувњак

Невладините организации неодамна со декларација ја потсетија власта дека е одговорна да го направи решителниот чекор за деблокирање на Македонија на патот кон ЕУ и кон НАТО. Деновиве истото го сторија и опозициските партии, бидејќи сметаат дека премиерот Никола Груевски и владејачката ВМРО-ДПМНЕ со сите оние потези што ги влечат во последно време во континуитет, се' повеќе не' оддалечуваат од оваа цел. Ја испуштивме шансата за добивање датум за преговори со ЕУ во јуни каде што не бевме спомнати ниту со збор. Новата надеж е ноември, на Самитот на НАТО во Лисабон.

Но, кога партиите од власта ќе станат потписници на иста таква деклараци��а, не само што е чудно туку безмалку е комично. Зашто повеќе од јасно е дека од ваквото јавно прокламирање нема никакви ефекти, туку намената е за дневно-политичка употреба. Еве, колку да се каже дека и тие биле за ЕУ и за НАТО. Тамам работа да не е така. Нели двапати добиваат мандат од граѓаните не само за да направат економски просперитет во земјава туку да не одведат таму каде што припаѓаме.

Потписниците на декларацијата констатирале дека е особено важно сите политички партии во своето однесување да го афирмираат духот на заедништво во насока на што поскоро остварување на целта за полноправно членство во ЕУ.

Зборови, зборови, зборови ... Кому власта ќе му врши притисок со ваквите декларации? На самата себе!? Кој и' брани да премине од зборови во дела.

Заборави ли дека пред само неколку дена од говорницата токму Груевски им порача на сите дека ВМРО-ДПМНЕ нема намера да тргува со интересите на сопствениот народ и држава. А, после го убедуваше Филе колку власта била посветена на решавањето на проблемот со името. Прашање е само како. Белки не мисли дека проблемот ќе се реши само со декларации и со големи зборови.