Поглед

Старо-нова облека

Александриjа Стевковска

Нема веќе нова сезона, нова облека. Високите цени на новата облека се' почесто не' принудуваат да буричкаме по старата гардероба и од неа да извлечеме парчиња со кои ќе поминеме уште една сезона. Надевајќи се дека в година ќе дувнат поповолни ветрови и дека тие ќе ни донесат повеќе пари со кои ќе можеме да се подновиме. Тоа единствено би не' спасило од ново нуркање во старите плакари, не само нашите, туку и оние на нашите мајки, баби, бидејќи модата, но и немаштијата постојано се враќаат. Значи старите капутчиња, старите панталони ќе не греат и оваа сезона, ако се здрави. Ако не или иглата во раце нешто од нив да се подзакрпи, нешто да се подзапере или, пак, сите во најблискиот кинески центар, бидејќи само таму цените се кроени според наша мерка.

Како и да е, ќе ја поминеме и преживееме и оваа сезона, но дали в година навистина ќе имаме со што да ја обновиме старата облека. Светските берзи алармираат дека цената на памукот вртоглаво расте, што значи дека сета памучна облека, исто така, ќе поскапува. Речиси научна фантастика е помислата дека наскоро нашите плакари ќе и' се израдуваат на нова облека. Поскапувањата се неминовни и нормални, бидејќи и оние што ја прават таа облека мора од нешто да живеат, да платат кирија, струја, вработени. Но, зголемување на цените можат да го издржат само нормални плати и стандард кој не се држи постојано на тенок мраз. А нашиот не е таков. Тој е истенчен докрај и не дозволува ништо друго освен платата, ако ја имаме, да ја трошиме само на храна. За облека и вака и така не стигнува. Е па, со здравје старо-новата облека и оваа сезона. Новите модели ќе ги гледаме само од излог, а продавниците и понатаму ќе зјаат празни. Галопот на цени не е кроен по мерка на Македонецот. Нова облека, можеби в година!