„Макфест 2010“

Ламбе - победник, доминација на ѕвездите од реалните шоуа

Јубилејното 25. издание на „Макфест“ годинава (по минатогодишните одложувања) се случи во неговиот традиционален термин - викендот пред празникот 11 Октомври, без промена на локацијата - Штип. Во вообичаен тридневен формат (7, 8 и 9 октомври), на „Макфест“ се случија 28 нови песни во духот на актуелните тенденции во македонската забавна музика - доминација на пејачите изродени низ балканските реални шоуа.

Победата на младиот, но веќе долгогодишен ексклузивец на „М-2 продукција“, Ламбе Алабаковски, го даде финалниот белег на јубилејниот „Макфест“. Иако Ламбе во текстот на својата победничка песна инсистираше „Не планирам“, очигледно фестивалската публика го имала во план за победа. Песната „Не планирам“ е авторско дело на Јован Јованов (музика), Елвир Мекиќ (текст) и Иван Иванов (аранжман).

Второто место на штипскиот фестивал го освои битолчанецот со македонско- бугарска кариера Бојан Стојков, со песната „Невени те покриваат“, според музика и аранжман на Хари Котларовски, а текстот го напиша самиот изведувач.

На третото место се пласира ѕвездата од реалното шоу „Операција триумф“, Александар Белов, со песната „Бум“, потпишана од авторскиот тандем Владимир Дојчиновски и Кристијан Габровски.

Во прилог на ��елиот амбиент и впечаток се и наградите за Дарко Илиевски (за сценски настап, најдобар дебитант и најдобра интерпретација), кои ги освои со изведбата на баладата „Утре е нов ден“.

За најслушана песна меѓу два „Макфеста“ е прогласена песната „Кажи кој те има“, а наградата за најдобар текст му припадна на Борче Димитров за песната што ја изведе Наде Талевска „Последниот лет“. (Ј.П.)