Извештајот за „кингерот“ стаса кај Шврговски

На владините служби им требаа повеќе од десет дена за да го испратат најновиот извештај за паѓањето на „кингерот“ во Обвинителството. Од вчера извештајот подготвен од тим домашни и странски експерти, во кои, наводно, се наоѓаат новите докази за причините за паѓањето на владиниот „кингер“, кој пред повеќе од осум години се урна во Мостар, се наоѓа на масата на државниот јавен обвинител, Љупчо Шврговски. Извештајот, кој треба да фрли нова светлина на загинувањето на поранешниот претседател на државата, Борис Трајковски, и на осумтемина негови соработници и членови на екипажот, беше разгледан на затворена владина седница уште на 28 февруари.

Како што беше заклучено во владините заклучоци, покрај Обвинителството, извештајот треба да биде испратен уште на неколку други адреси - во Дирекцијата за цивилна пловидба на Босна и Херцеговина, како и до Комитетот за правни прашања и човекови права при Европскиот парламент, до Советот на Европа, како и до Андрејас Грос, европратеник од Швајцарија.

Со оглед на фактот што вчера беше последен ден во неделата, како и зафатеноста на државниот јавен обвинител Шврговски поради коктелот организиран во Републичкото јавно обвинителство во чест на четворицата тазе пензионирани заменици, најверојатно, извештајот ќе биде даден во работа од понеделник.

Обвинителството го затвори овој случај со резолуција во која беше наведено дека ,„кингерот“ со кој патувал претседателот Трајковски се урнал поради грешка на пилотите. Сепак, Шврговски неодамна изјави дека одлуката може да се смени доколку се појават нови докази што укажуваат на друга причина за падот на авионот. Од тоа ќе зависи и дали ќе има нова истрага. (Г.Д.)