Парите на скопјани потрошени за плажи и бродови

„Градоначалникот Коце Трајановски со неговите скопски колеги од ВМРО- ДПМНЕ, ја побараа довербата на граѓаните со слоганот ’Заедно можеме повеќе‘. И, да, точно е! На сите им стана јасно дека заедно профитираа само за себе и ’фамилијата‘ и со години го уништуваат нашиот главен град. Во Скопје не се изгради ниту еден капитален објект кој треба да ја одбележи иднината на генерациите што доаѓаат. Парите на граѓаните единствено се трошат на споменици, нефункционални плажи, бродови, на дебели хонорари за анонимни уметници и на криминални урбанистички планови“, рече вчера потпретседателот на СДСМ, Гордан Георгиев, на прес-конференцијата пред Триумфалната порта, потсетувајќи дека во досегашниот мандат на Трајановски се потрошени повеќе од 500 милиони евра само за проектот „Скопје 2014“.

Потенцирајќи дека состојбата е иста во секоја општина каде што градоначалник е човек од ВМРО-ДПМНЕ, Георгиев ги наброи најголемите проблеми со кои се соочуваат граѓаните во секоја скопска општина пооделно.

„Паушални обвинувања“, вратија од ВМРО-ДПМНЕ и ги набројаа проектите изведени во Скопје во текот на изминатите години: проширени и новоизградени булевари, кружени текови, реновирани мостови кои добија нова ограда и осветление, реконструирани фасади на 12 средни училишта, изградени многубројни спортски објекти и терени, потоа новите автобуси за градскиот превоз, доградбата на арената „Филип Втори“, жичарницата на Водно, легализацијата на дивоградбите, откупот на дворовите.