Иницијативата за Чаир поднесена до Уставен суд

Уставниот суд потврди дека примил иницијатива за проверка на уставноста и законитоста на одлуката за промена на имињата на училиштата во Чаир, но не соопшти детали од кого и по кои основи се оспорува ова. Директорот на државниот инспек��орат за локална самоуправа, Ванчо Шехтански, вчера ни потврди дека поднел иницијатива до Судот. „Да, точно ја поднесов иницијативата за оцена на уставноста и законитоста на одлуката за промена на имињата на училиштата во општина Чаир, со барање за изрекување привремена мерка со која би се стопирале сите натамошни активности“, ни појасни Шехтански.

Министерот за образование и наука, Панче Кралев, пак, вчера изјави дека без разлика на постапката во Уставниот суд тие ќе постапуваат по барањата за промена на статутите на училиштата кои се испратени до нив. „Во врска со случајот во Чаир ќе постапуваме исто како и со другите барања за промена на статутите и ќе ги разгледуваме кога ќе дојдат на ред. Во меѓувреме, ја очекуваме и официјалната одлука на министерот за локална самоуправа, Невзат Бејта, со која беше поништена одлуката на Шехтански“, ни изјави министерот Кралев.

Инаку, во министерството појаснуваат дека е можно да пресечат за Чаир и пред да се донесе конкретна одлука од Уставниот суд, но потоа ќе се почитува одлуката на судот.(Ж.Х.З.)