ИОК поведе истрага за возраста на кинеските гимнастичарки
Дилемата е дали двократната шампионка Хе Кексин има 14 или 16 години, колку што е дозволено
Меѓународниот олимписки комитет (ИОК) покрена истрага во врска со наводното фалсификување од кинеските власти на возраста на освојувачката на два златни медала во гимнастика Хе Кексин. Кинеската, која се позлати во екипна конкуренција и ја однесе олимписката титула на двовисински разбој поединечно, е регистрирана дека е родена на 1 јануари 1992 година. Но, по зачестените медиумски написи дека таа на претходните натпреварувања учествувала со подоцнежен датум на раѓање, вчера се појави и американски стручњак за компјутери со тврдење дека дошол до кинески државни документи што докажуваат оти Хе има 14, а не 16 години, колку што е долната возрасна граница за учество во овој спорт на ОИ. Насловот на фотографијата објавена од кинеската државна новинска агенција Хсинхуа минатата година зборува за „13-годишната Хе Кексин“, а весникот “Чајна дејли“ во мај годинава пишуваше дека таа има 14.
Претставник на ИОК изјави дека Интернационалната гимнастичка федерација (ФИГ) била замолена да ги разгледа „разликите“ околу возраста на Хе, но други нагласуваат дека нејзе веќе и' било дозволено да настапува.
„Се' што е примено досега покажува дека немаме проблем со исправноста на овие натпреварувачи“, вели спортскиот директор на ИОК, Кристоф Дуби, додавајќи дека ФИГ побарал истрага од Кинеската гимнастичка федерација.
Портпаролката на ИОК, Џизел Дејвис, додаде дека организацијата сака да го расчисти прашањето стопроцентно и да го затвори.
Гимнастичарите мора да имаат наполнето 16 во годината на Игрите за да учествуваат, правило воведено во 1997 за да се заштити нивното здравје. Тренерот на кинеската репрезентација Хуанг Јубин на прес-конференција изјави дека „целиот тим целосно го исполнува правилото за потребните години“.
„Со оглед на тоа дека азиските тела не се исти со западните, се поставуваат прашања, но не би требало“, смета Јубин. |
