Јамајка со светски рекорд и на 4х100 м
Златен хет-трик во Пекинг за Болт, кој трчаше во третата измена, а Пауел финишира во најбрзата штафета во историјата
Доминацијата на атлетичарите на Јамајка во спринтерските дисциплини на 29. Олимписки игри во Пекинг ја заокружи машката штафета на карипскиот остров со златен медал и со светски рекорд од 37,10 сек. на 4х100 м. Усеин Болт, кому ова му е трето злато со планетарен рекорд на Игрите, во третата измена ја донесе решавачката предност, која со извонреден финиш ја потврди Асафа Пауел. Заедно со првите две измени Неста Картер и Мајкл Фрејтер, тие дотрчаа до целта 30 стотинки побрзо од досегашниот рекорд на САД од ОИ 1992 во Барселона, репризиран на Светското првенство наредната година во Штутгарт.
Тринидад и Тобаго го освоија среброто со време 38,06 сек., а бронзата со 38,15 сек им припадна на Јапонците. Велика Британија, САД и Нигерија, кои по тој редослед си ги поделија медалите во Атина, киксираа при измените во квалификациите.
За разлика од машката штафета на стотка, Јамајка остана без „капарисаното“ злато во женска конкуренција, каде што со дисквалификацијата практично и' го подари најблескавиот метал на Русија. Шерон Симпсон и Керон Стјуарт, кои го поделија сребрениот медал на 100 м, не си ја примопредадоа палката во втората измена во предвиденото растојание и заедно со САД, кои киксираа во квалификациите, останаа без пласман. Русинките Полјакова, Федорова, Гушчина и Чермошанскаја победија со време 42,31 сек., Белгија стана неочекуван вицешампион со национален рекорд од 42,54 сек., а Нигерија ја собра бронзата со 43,04 сек.
Светската рекордерка Тирунеш Дибаба од Етиопија стигна до второто злато во Пекинг по тоа на 10.000 м, триумфирајќи во финалето и на двојно покусата дистанца. Иако времето 15:41,40 мин. е далеку од рекордните 14:11,15 мин. што ги истрча на 6 јуни во Осло, Дибаба ја остави конкуренцијата зад себе. Втора заврши натурализираната Турчинка од кениско потекло Елван Абејлегесе, а успехот на Етиопија со бронзениот медал го заокружи Месерет Дефар.
Стив Хукер од Австралија се закити со златото во скок со стап, зачинето со нов олимписки рекорд од 5,96 м, еден сантиметар подобар од досегашниот на Американецот Тим Мек од Атина 2004. Втор заврши Русинот Евгениј Лукјаненко со прескокнати 5,85 м, а третото место и бронзениот медал му припаднаа на Украинецот Денис Јурченко со 5,70 м поради подобрата серија во кругот од четворица со идентичен резултат.
Американецот Брајан Клеј е нов олимписки првак во десетобој. Најсестраниот атлетичар во Пекинг освои вкупно 8791 поен, 240 повеќе од „сребрениот“ Андреј Краучанка од Белорусија, а бронзениот медал го освои Леонел Суарез од Куба со 8527 поени.
Бразилката Маурен Маги за само еден сантиметар и' го „украде“ златото на Русинката Татјана Лебедева во скок во далечина. Таа уште во првиот обид го оствари победоносниот скок од 7,04 м, а бранителката на олимписката титула и светска шампионка Лебедева во последната серија прескокна сантиметар помалку. Бронзата замина за Нигерија кај Блесинг Окагбаре, чиј најдобар резултат беше 6,91 м, а во финалето влезе благодарејќи на дисквалификацијата од Игрите на допингуваната носителка на среброто во седмобој Људмила Блонска од Украина.
Алекс Швацер од Италија го освои златниот медал во брзо одење на 50 км, и покрај бруталните временски услови предизвикани од силното сонце. Носителот на две бронзи од светските првенства го презеде водството во 42. километар и не го испушти до крајот, финиширајќи по 3:37,09 ч. и подобрувајќи го олимпискиот рекорд на Вјачеслав Иваненко од Сеул 1988 за 1,20 минути. Австралиецот Џаред Талент, кој беше „бронзен“ на 20 км, отиде место погоре со среброто со личен рекорд послаб за 2,18 мин. од времето на победникот. Денис Нижегородов од Русија, вицешампионот од Атина 2004 што во мај во рускиот град Чебоксари постави нов светски рекорд од 3:34,14 ч., овој пат се задоволи со бронзата, заостанувајќи 3,05 мин. зад Швацер. |
