Унгарија против САД ќе го брани златото од Атина
Американците славеа против Србија 10:5, Црногорците загубија од Унгарија 11:9
Машката ватерполо репрезентација на Унгарија е првиот финалист на ватерполо турнирот во Пекинг. Во тешка и беспоштедна битка ватерполистите на Унгарија во рамките на полуфиналето го совладаа актуелниот европски првак селекцијата на Црна Гора со 11:9 (3:4, 3:3, 3:0, 2:2), и покрај тоа што црногорците одлично го започнаа натпреварот.
Овој дуел покажа и докажа дека во моментов на Балканот се игра најквалитетен ватерполо, а овие два тима според потенцијалот и квалитетот сосема заслужено се наоѓаат на самиот врв во светот.
Селекцијата на Унгарија со победата над Црна Гора во големото финале ќе се обиде да ја одбрани титулата освоена пред четири години во Атина. Унгарците притиснаа кога беше најважно, и против актуелниот европски првак го одиграа можеби најдобриот меч на турнирот. Од друга страна, на црногорците како да им недостасуваше сила, која ги издаде во решавачките моменти на средбата. Инаку, тие одлично го започнаа мечот и по завршувањето на првата четвртина имаа гол предност (4:3) пред Унгарците. Нивната диминација продолжи и во вториот период кога во еден момент имаа дури три голови предност (6:3). Сепак, актуелниот олимписки првак успеа да се врати во игра најмногу благодарение на расположениот Гергељ Киш, кој не дозволи црногорците резултатски да се одлепат. Клучна во поразот на селекцијата на Црна Гора беше третата четвртина, која сосема заслужено им припадна на Унгарците со 3:0. Имено, тие во овој период на голот го имаа расположениот Иштван Гергељ, кој беше речиси несовладлив, а на спротивната страна Норберт Мадараш и Денеш Варга беа посебно расположени во нападот, така што унгарците за прв пат, на крајот на овој период, стигнаа до резултатска предност од 9:7.
Последниот конкретен напор да се спаси поразот и средбата, Гојковиќ и другарите го направија на почетокот на последниот период кога со прекрасниот гол на Гојковиќ израмнија на 9:9. Сепак, тоа беше нивниот последен дострел, бидејќи Унгарците во продолжението, преку Кашаш и Варга брзо возвратија на плус два, што беше доволно за почеток на нивната прослава со пласманот во големото финале.
На второто полуфинале, ватерполистите на соседна Србија не успеаја да го повторат успехот од првиот дел кога ја совладаа селекцијата на САД со 4:2 во рамките на мечевите по групи. Србите овојпат загубија со убедливи 10:5 (3:3, 1:2, 1:2, 0:3), во меч во кој резултатската неизвесност траеше само до средината на вториот период. Имено, расположените Американци кои го имаа феноменалниот Мозес на голот, во буквална смисла на зборот ја спуштија завесата пред нивниот гол, и на нервозните српски ватерполисти за нешто повеќе од две четвртини им дозволија да постигнат само еден гол, за сметка на петте кои завршија во мрежата на Србија. |
