Американките победнички во фудбал
Во реприза на атинското финале, САД со голот на Лојд во продолженијата ги совладаа Бразилките
Историјата се повторува. Фудбалерките на САД го одбранија златниот трофеј на женскиот фудбалски турнир на Олимписките игри во Пекинг. Тие во финалето исто како пред четири години ја совладаа селекцијата на Бразил со 1:0. Сепак, до најдрагоцената победа, Американките овојпат дојдоа дури во продолжението на натпреварот.
Стрелец на единствениот погодок на оваа средба беше Карли Лојд во 96. минута од натпреварот. За волја на вистината, Бразилките во поголемиот дел од мечот ја имаа под контрола играта и доминираа на теренот, меѓутоа не успеаја да му се реваншираат на противникот за поразот од Атина.
За фудбалерките на САД ова беше трето злато освоено на досега одржаните четири олимписки турнири, откако женскиот фудбал и официјално влезе во олимпискиот календар на ИОК. Американките само во Сиднеј 2000 не успеаја да го освојат првото место кога мораа да се задоволат со сребрениот медал.
За да биде распоредот на освоените медали истоветен како оној од пред четири години од Атина, се потрудија фудбалерките на Германија кои во борбата за третото место и освојување на бронзениот медал, успеаја да ја совладаат селекцијата на Јапонија со 2:0. Стрелец на двата гола за оваа екипа беше Фатмире Бајрамај во 69. и 87. минута од натпреварот. |
