Бекам и официјално на затворањето на Игрите
Англиската фудбалска ѕвезда ќе присуствува на предавањето на олимпиското знаме на Лондон
Фудбалскиот репрезентативец на Англија, Дејвид Бекам, ќе се најде на централната бина кога олимпиското знаме ќе му биде врачено на Лондон за време на церемонијата на свеченото затворање в недела во Пекинг. Бекам, чијашто популарност во Кина ги засенува дури и таа на уривачот на рекорди во пливање Мајкл Фелпс и на спринтерската сензација Усеин Болт, ќе биде дел од осумминутниот пресек од програмата на затворањето на Игрите во чест на домаќинот на следната ОИ 2012, Лондон. Фудбалерот на Лос Анџелес галакси ќе биде придружуван на стадионот „Птичје гнездо“ од гитаристот на групата „Лед Цепелин“, Џими Пејџ, потоа од пејачката родена во Лондон, Леона Луис, како и од танчерите од Кралската опера и од повеќемина спортисти-учесници на поранешните олимпијади.
На свеченоста на затворањето ќе присуствува и британскиот премиер Гордон Браун, кој ќе биде сведок на примопредавањето на знамето од градоначалникот на Пекинг, Гуо Јинлонг, на неговиот лондонски колега Борис Џонсон. Никакви детали не се објавени за содржината на шоуто или за тоа каква точно ќе биде улогата на Бекам, но и самото негово појавување се очекува да го измами најголемиот аплауз на вечерта.
„Тој беше пасиониран поддржувач на кандидатурата во нејзината рана фаза, одигра клучна улога во гласањето во Сингапур, а беше и на поставувањето на камен-темелникот на Олимпискиот парк во Лондон“, изјави Бил Морис, директор за церемонии на Организацискиот одбор на ОИ во Лондон.
Поранешниот играч за врска на Манчестер јунајтед и на Реал Мадрид, кој има тетоважа на кинески на телото, беше „сардисан“ при пристигнувањето на аеродромот во Шангај со Л.А. Галакси оваа година, а има и клуб на обожаватели во Кина со неколку стотици милиони членови!
Морис вели дека темата на претставувањето на Лондон ќе биде „едноставно и забавно“ и оти нема да се обидат да се натпреваруваат со ништо што го направи Пекинг за време на блескавата церемонија на отворањето.
„Ова не е момент во која би сакале да се натпреваруваме со навистина извонредниот труд на организаторот вложен во церемониите“, изјави Морис. „Но, нашето претставување ќе биде младешко, поинакво, гласно и гордо. Ова ќе биде, исто така, одлична можност за прослава на големиот успех на британските спортисти на овие Игри“.
Градоначалникот Џонсон, пак, се пошегува дека веќе тренира за моментот на примопредавањето на знамето.
„Растреперен сум, мотивиран, неверојатно возбуден, но не и уплашен“, порача „градскиот татко“ на Лондон. |
