Од Скопје до Европа за 29 евра плус аеродромски такси

Од Скопје до бројни европски градови ќе може да се патува за 29 евра плус аеродромски такси, преку понудата на компанијата „Монтенегро ерлајнс“. Оваа компанија вчера ја претстави сопствената флота и плановите за продолжување на сообраќајот во зимската сезона. Компанијата работи во Скопје од јуни годинава и според комерцијалниот директор на „Монтенегро ерлајнс“, Чедомир Ѓуришиќ, пазарот во Македонија е една од стратешките точки на мапата на компанијата. „’Монтенегро ерлајнс‘ располага со флота од седум авиони, од кои пет се од марката ’Фокер 100‘ и два од марката ’Ембраер 195‘, кои ќе летаат четири пати седмично од Скопје преку Подгорица до Франкфурт, Рим, Париз, Лондон, Дизелдорф, Цирих, Рим и Виена“, истакна Ѓуришиќ.

За коминтентите, се разбира, најинтересна е понудата за акцијата „Европа на дланка за 29 евра“. Станува збор за понуда која „Монтенегро ерлајнс“ ја подготвила специјално за македонскиот пазар.

Билетот за релација од Скопје до бројни европски градови патниците можат да го купат за 29 евра, плус аеродромските такси. Цената е исклучително конкурентна и овозможува по поволни услови брзо поврзување на регионов со европските метрополи.

За своите лојални патници „Монтенегро ерлајнс“ обезбедува и соодветно ниво на членство т.е. ниво на користење на услугите. Имено, со зачленувањето во „висион тим“ секогаш кога ќе купите билет добивате одреден број милји, кои се додаваат на вашата „висион пас“ сметка и врз основа на собраните милји се одобруваат бројни поволности кои „Монтенегро ерлајнс“ ги предвидува за своите патници. (Н.П.)