13 години со „Утрински весник“

Почитувани читатели на „Утрински весник“, денеска одбележуваме 13 години од нашето заедничко дружење.

Почитувани читатели на „Утрински весник“, денеска одбележуваме 13 години од нашето заедничко дружење. Некому овој период може да му изгледа краток во историјата на еден дневен весник, особено ако се спореди со над стогодишните традиции на некои светски весници, но за нас кои секојдневно го подготвуваме е повод за гордост и радување.

Денеска во рацете го држите 3.912 - тиот број на Утрински весник. Тоа се 3.912 затреперувања на срцето кога ние што го правиме весникот ќе ја видиме насловната страница на трафика задолжително поставувајќи си го истото прашање: „можеше ли да биде и подобро“? Тоа се, верувајте, 3.912 посебни вибрации кои проструиле низ нас кога ќе видиме дека конкурентскиот весник има добра сторија а ние ја немате. Или кога ќе добиеме комплимент дека сме направиле добро издание на весникот. Тоа се чувства кои само ние новинарите можеме да ги разбереме и кои конечно се нишката која не' поврзува без оглед на сето она што денеска се случува во новинарската сфера.

Но, не се жалиме. Одбравме благородна и моќна професија и ќе издржиме. Во изминатите 13 години „Утрински весник“ помина низ многу трансформации. Некои беа видливи за вас, почитувани читатели, но некои си ги знаевме само ние внатре и се трудевме секоја нова ситуација да ја искористиме за да го зајакнеме мостот кон вас. Некои медиуми одбираат да говорат на висок тон, со многу негативни или позитивни емоции кон оние за кои извествуваат. Утрински весник остана препознатлив по својот умерен тон, кој некогаш може да биде и жесток и циничен или провокативен како што и треба да биде еден весник, но никогаш не ��а напуштивме културата на известување - она што толку многу недостига на овие простори. Сметаме дека јазикот на кој говори еден современ медиумски продукт е најважниот атрибут во комуникацијата и разбирањето со читателите и најсигурната влезница во нивното секојдневие.

Остануваме посветени и натаму на ��валитетното, актуелно и објективно информирање, истовремено интересирајќи се за иновациите кои се составен дел во секоја професија, па и во журнализмот. Не се плашиме од напливот на нови весници или интернет конкуренцијата. Доволно сме професионални за брзо да ја согледаме разликата меѓу класичното новинарство и инстант информациите што ги нуди интернетот кои најчесто во трката со времето се или неточни или непрофесионално обработени. Или од весниците кои работат според строго определена политичка агенда која има го нарушува угледот и им ја загрозува позицијата на пазарот.

Останете во добро здравје и расположение, почитувани читатели, и продолжете и понатаму да читате Утрински весник.Нема да ве разочараме.



Соња Крамарска, главен и одговорен уредник