Анан со повик за влада на национално единство во Сирија

Евентуална влада на национално единство може да вклучува членови на сегашната влада, претставници на опозицијата и други

Русија и други водечки сили го информирале посредникот за Сирија Кофи Анан дека ја поддржуваат неговата идеја за сириска влада на национално единство во која би биле претставници на сегашната влада и опозицијата, тврдат дипломати за западни медиуми.
Според нив, предлогот е една од главните теми кои ќе ги разгледаат членки на СБ на ОН и други клучни „играчи“ во Бискиот исток на средбата во Женева в сабота посветена на конфликтот во Сирија.

Изворите велат дека евентуална влада на национално единство може да вклучува членови на сегашната влада, претставници на опозицијата и други, но во неа не би влегле луѓе „чие трајно учество или присуство би било закана за надежите за политички преод или би им попречиле на напорите за помирување и стабилност“.

Според нив, идејата за исклучување одредени луѓе очигледно се однесува на Башар Асад, макар што во предлогот на Анан не се споменува изрично дека сирискиот претседател не може да учествува во влада на национално единство.

Во меѓувреме и иранскиот амбасадор во Обединетите нации Мохамед Хазаи изјави дека Иран е подготвен да помогне на меѓународниот претставник Кофи Анан да постигне мир во Сирија, но ако некои земји не сакаат Техеран да учествува на состанокот на светските сили „тоа е нивен проблем“.

Средбата организирана од Анан ќе се одржи во Женева во сабота и учесниците во неа ќе бараат начин за прекин на судирите во Сирија и остварување на политичка транзиција.

САД, Велика Британија и Франција го обвинуваат Иран дека пружа помош на режимот на сирискиот претседател Башар ал Асад во справувањето со бунтот против неговото управување.