Иванов: Македонија има за цел да биде ставена на мапата на енергетски коридори

Трите столбови врз кои ја градиме иднината на Република Македонија се трите „Е“ – Европа, економија и енергија

Република Македонија има за цел да биде ставена на меѓународната мапа на енергетски транспортни коридори, со што ќе се отвори можност за добивање евтини енергенси за македонските компании и домаќинства и намалување на цената на домашното производство, изјави македонскиот претседател Ѓорге Иванов во обраќањето на официјалното отварање на 23. годишна сесија на Форумот Кран Монтана, кој почна денеска во Баку.

Тој посочи дека тоа ќе претставува конкретен влог во енергетската и во генералната економска стабилност и сигурност на Македонија и на регионот.

- Трите столбови врз кои ја градиме иднината на Република Македонија се трите „Е“ – Европа, економија и енергија и овие три меѓузависни и тесно поврзани „Е“ се клучни за развојот на државата, изјави Иванов.

Тој потенцира дека Македонија останува посветена на стратешката цел – членство во Европската унија и НАТО и чекорејќи по тој пат земјата е целосно фокусирана на подобрувањето на целокупната економска состојба.

Претседателот изрази уверување дека овој мировен проект нема да биде завршен без членството на Македонија и на останатите земји од Западен Балкан. Иванов посочи дека чекорејќи на патот кон европска и евроатлантската интеграција Македонија е фокусирана на подобрување на економска состојба во земјата, на борбата против сиромаштијата и невработеноста, а сето тоа преку создавање на поволна бизнис-клима, која ќе привлече директни странски инвестиции.

- Економскиот развој кон кој сме целосно посветени е незамислив без енергетска безбедност и сигурност. Тоа важи речиси за сите земји во светот. Важи и за Република Македонија. Денес сме тука во Баку, во една од областите која има изобилство на нафта и на природен гас, рече Иванов.

Тој потенцира дека Македонија, како впрочем и другите балкански земји е заинтересирана за приклучување кон енергетските коридори и додаде дека Македонија, како и останатите балкански земји сака енергетската зависност да ја замени со енергетска меѓузависност. За таа цел, нагласи претседателот, потребна енергетска диверзификација.

Обраќајќи се пред учесниците, на Форумот, кој го отвори претседателот на Азербејџан, Илхам Алиев, Иванов нагласи дека Кран Монтана повеќе од четврт век на едно место собира луѓе со исклучителни достигнувања, луѓе со визија за иднината и мисија за подобар свет.

Претседателот Иванов истакна дека овогодиншниот Форум е посветен  на дискусија за два клучни предизвика: борбата против сиромаштијата и унапредувањето на менаџирањето со јавните политики.

На годинешната сесија на Форумот во Азербејџан учествуваат голем број актуелни и поранешни шефови на држави, министри, високи претставници на меѓународни организации и мултинационални корпорации.

На претседателот Иванов вечерва ќе му биде доделено одликувањето „Кран Монтана“- номинација на нови лидери за иднината 2012.