27.06.2012, 23:40 Шпанија прв финалист на ЕП 2012
„Фуријата" ја елиминира Португалија на пенали со 4:2 и ќе го брани тронот против победникот од утрешниот меч меѓу Германија и Италија
Шпанија ќе ја брани титулата на Европското фудбалско првенство во Полска и Украина во недела во Киев против подобриот од утрешниот дуел меѓу Германија и Италија. Во вечерашното полуфинале во Доњецк, шпанските репрезентативци ја елиминираа Португалија по подобро изведување на пенали со 4:2, откако немаше погодок во основните 90 минути и во двете продолженија по 15 минути. Иниеста, Пике, Рамос и Фабрегас погодија за "фуријата" (промаши Чаби Алонсо), Пепе и Нани беа прецизни кај Португалците (промашија Мутињо и Бруно Алвеш).
Шпанската тика-така не дојде до израз во првото полувреме. Португалците умешно и успешно се справија со фаворизираниот сосед и не му дозволија да се разигра и размавне како што знае. Во речиси сите 45 минути беа рамноправни на теренот и покажаа дека националниот тим не е само Кристијано Роналдо туку колектив, па будно го држеа под око секој потег, секое движење и секое додавање на репрезентативците на Шпанија. Изостанаа голови затоа што изостанаа и шанси за реализација. Патот до мрежата најчесто се бараше со обиди од далечина. "Фуријата" се закани двапати, преку Арбелоа и Иниеста, а "европските Бразилци" еднаш, преку својот капитен Кристијано Роналдо, но ниту една од заканите не одеше во рамки на целта, па и Касилјас и Руи Патрисио останаа без работа во воведниот дел од пиринејската фудбалска полуфинална битка.
И Дел Боске и Паоло Бенто влегоа во вториот дел со почетните состави. Но, не за долго. Првиот потег го повлече шпанскиот селектор кој по нецели 10 минути во продолжението во игра го уфрли Сеск Фабрегас наместо Негредо од едноставна причина. Да добие повеќе простор за игра во средината одошто во врвот на нападот. Само пет минути подоцна нова замена кај Шпанците. Давид Силва му отстапи место на Хесус Навас со што Дел Боске се корегираше за првичниот избор на фудбалери и тактичките замисли што ги имаше со нив. Меѓутоа ситуацијата на теренот не се промени во поглед на головите. Португалија се закануваше од дистанца, двапати од игра се обиде Алмеида, исто толку удари упати Роналдо од прекин плус контранападот во 90 минута пришто мрежата на Касилјас остана мирна. Како одминуваше времето претпазливоста се повеќе доаѓаше до израз на сметка на желбата и амбицијата да се реши мечот во регуларниот дел и приоритет стана одбрана на сопствениот отколку напад на противничкиот. Конечните 0:0 беа направеден епилог по она што го видовме од актерите во мечот, идентично минаа и дополнителните 30 минути на "Донбас арена" во Доњецк. (С.Д.)
|
