23.06.2012, 22:49 Македонија домаќин на ЕП за ракометарки до 17 години
Шампионатот ќе се одржи од 13 до 23 август 2015 година, а натпреварите ќе се играат во Скопје и во Охрид
На Конгресот на ЕХФ што се одржува во Монте Карло, Македонија ја доби организацијата на Европското првенство за ракометарки до 17 години. Шампионатот ќе се одржи од 13 до 23 август 2015 година, а натпреварите ќе се играат во Скопје и во Охрид.
Покрај доделувањата на организацијата на младинските шампионати, ЕХФ ги одреди и домаќините на Европските првенства во сениорска конкуренција за 2016 година.
Мажите ќе играат во Полска, која со 27 гласови ја доби организацијата пред Хрватска (15 гласови) и Норвешка (4 гласови). Натпреварите ќе се играат во Гдањск, Катовице, Лоѓ. Краков и во Вроцлав од 17 до 31 јануари.
По откажувањето од трката за организација на Турција, Шведска ја доби организацијата за женското ЕП 2016 година (4-18 декември). Натпреварите ќе се играат во Стокхолм, Кристианстад, Гетеборг, Хелсингборг и во Малме.
|
